Dima ke Çewlîg de esnafan faturayê ceyranî camanê dikanê xo ra daliqnayî û ser de ''Şelênayîş esto'' nuşt Amed de zî esnafan zî camanê xo ra heman nuşte daliqna.

Taxa Ofîsî ya qezaya Yenîşehîrî ya Amedî de xeylêk esnafan caman xo ser de ''Şelênayîş esto! Zulmê TEDAŞî rê ney'' nuşt û vera faturayanê ceyranî nêrazîbîyayîşê xo mojna.

Davud Karakuzuyo ke wayîrê dikanê telefonan o, da zanayene ke faturaya ci ya ceyranî 1150 TL ameya û vat: ''1150 lîra şina ceyran, 2000 şina personelan û 1000 zî şina werd. Ma cara 4000 lîra qezenç kenê.''

Esnaf Şîyar Goktîmurî vat: ''Teşrîna peyêne-kanûna 2021î de faturayê ma 500-600 lîra bîyî, ewro 2-3 hezar ê. Mesele hînî eyarî ra vejîyaya. Ma nêeşkenê hertim terefgîr û sermayedaranê înan mird bikerê.''