Virardişanê Qirkerdişê Pirsûsî de bi desan kesî ameyî destbendkerdene

Îstanbul, Îzmîr û Anqara de vîrardişê şehîdanê Qirkerdişê Pirsûsî de polîsan hêriş kerd bi desan kesî destbend kerdî.

Vizêr vîrardişê şehîdanê Qirkerdişê Pirsûsî ke Îstanbul, Îzmîr û Anqara de ameyî kerdene de polîsan hêriş kerd û bi derbkerdişî bi desan kesî destbend kerdî.  Rojnamegerî zî tede xeylêk kesî zî birîndar bîyî.

Kadikoyê Îstanbulî de hetê Înîsîyatîfê Keyeyanê Pirsûsî ra eşkerayîya çapemenîye ameye organîzekerdene. Eşkerayîya ke xeylêk sîyasetmedarî û îdarekarê dezgehanê komalê sîvîlî tewrê ci bîyî şehîdî de ameyî vîrardene û qiseykerdişan de sozê hesabcipersayîşî ameyî dayene.

Dima ke rayraşîyayîş dest pêkerd , polîsan pê guleyanê plastîk û gazê îsotî hêriş kerd. Netîceya hêrişî de tewr tay 20 kesî pê îşkencekerdişî ameyî destbendkerdene. Çalakwanî semedê xo pawitişî şîyî banê HDPyî yê qeza. Polîsan ber û camê bîna şikitî û hêrişî rê dewam kerd. Kesê ke banê HDPyî ra vejîyayî teber waşt eşkerayîye bidê. Înan rê zî hêriş ame kerdene û 13 kesî ameyî destbendkerdene. Di rojnamegerî ke hêriş de birîndar bîyî pê ambulans ameyî berdene nêweşxane..

Reyna Îzmîr û Anqara de zî hêrişê polîsan de bi desan kesî ameyî destbendkerdene.  Anqara de 23 kesê ke ameyî destbendkerdene badê îfadedayîşî ameyî veradayene.