Tesîrê erdlerzê Mereşî yê 6ê Sibate bi taybetî cayanê elewîyan de dewam kenê. Elewîyî raştê îstîsmarê dewlete û cemaetan yenê. Serekê Pêroyî yê Komeleya Kulturî ya Pîr Sultan Abdalî Cuma Erçeyî derheqê babete de ANFyî rê qisey kerd.

Erçeyî da zanayene ke Komeleya Pîr Sultan Abdalî roja verêne xo resnayo warê erdlerzî, dewlete erey ameya warî. Erçeyî vat: ''Dewlete key ke ameye zî xeymî rotî, dest na hetkarîya madîye ser. Xora vilakerdişê hetkarîya seba mexdûran de zî cîyakerîye ame kerdene. Dewanê elewîyan rê hetkarîye tay ameye kerdene. Hêverî hetkarîya dewanê misilmanan ameye kerdene. Bazarçixê Mereşî de cemxane de ma koordînasyonê na ro la qeymeqamîya dewlete dest na hetkarîya ke koordînasyonî dabî arê. No serebût sey 'Cemxaneyî rê qeyûm ame tayînkerdene' veng vet la a raşte qeyûm hetkarîyan rê ame tayînkerdene.''

Erçeyî ard ziwan ke warê xeymanê mexdûranê erdlerzî de tehlukeyê rêxistinîya cemaetan resayo astêka pîle û derheqê babete de gerreyî zaf ê. Erçeyî vat: ''Dîlok de warê xeymanê mexdûran de xeyma kursê Quranî ya seba domananê 4-6 serrîyan ameye akerdene. Hayîya her kesî pê naye est a. Xora cemaetî zî xo nênimnenê. Tay domanî sêwir mendî, tay domanî vînîbîyaye yê. Ma eşnawenê ke nê domanî erşawîyayê tarîqatan. Ma embazanê xo ra eşnawit ke bi taybetî tarîqatê Menzîlî yê Semsûrî rê nê domanî erşawîyayê. Ma derheqê na babete de zaf gerreyî girewtî.''

Erçeyî îfade kerd ke cemxaneyan erdlerzî ra dima bê destekê dewlete zaf xebatî kerdê û vat: ''Dewlete bacî arê dana, bexşî arê dana û destê ci de hêz est o. Ganî karê ke ma kerdê, dewlete bikerdêne. Nê hetî ra ma vengîyêke kerde de.''