Rêxistina ASKAPENA ya ke welatê Baskî de seba azadîye têkoşîn kena xo rê paradîgmaya Rayberê Şarê Kurdî Abdullah Ocalanî û têkoşînê azadîye sey çimeyê îlhamî gêna. Rêxistine ra Marixe Ruiz de Austri derheqê paradîgmaya Abdullah Ocalanî û Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de ANFyî rê qisey kerd.

Marixe Ruiz de Austri da zanayene ke AKAPENA seba azadîya welatê Baskî 30 serrî yo têkoşîn kena û têkoşînê sosyalîstî xo rê kena esas. Marixe Ruiz de Austri vat: ''Welatê Baskî binê tedaya Spanya û Fransa de yo. Seba azadîya welatê Baskî ma têkoşînêkê enternasyonalîstî kenê. Çimeyê mi de paradîgmaya Abdullah Ocalanî seba têkoşînê ma çimeyêko pîl o.

Sere de PKK têkoşînê şarê kurdî welatê Baskî de şinasîyeno. Têkoşînê PKKyî seba ma çimeyêkê faydegirewtişî yo.''

Marixe Ruiz de Austri bale ante tecrîdê vera Rayberê Şarê Kurdî û vat: ''Şert û mercê ke Ocalan tede tepişte yê, dûrê edaletî yê. Ganî Ocalan sey tepişteyêkê sîyasîyî bêro dîyene û şinasnayene. Huqûq seba burjuvazî xebitîyeno. Ocalan şarê kurdî û pêro tepişteyanê sîyasîyan ê kurdan temsîl keno. Coka Hemleya Azadîye rê ganî pêro dinya paştî bida.

Ez wazena ney vaja ke Ocalan seba ma zî resimê hêvî yo. Ocalan seba ma hêvîye temsîl keno. Ma nika nêzanenê ke rewşa ey senîn a. Ganî ma azadîya Ocalanî bîyarê ca. Eke ma pêro fikranê Ocalanî ser o têkoşîn bikerê têkoşînê ma do dewam bikero û ser bikewo.''