Taxa Cûdî ya Cizîra Şirnexî de buroyê cinîya ê weçînayîşî yê Partîya Çep ya Keske (YSP) ame akerdene. Hemvervatoxa YSPyî Çîdeme Kiliçgun Uçar, Wekîla HDPyî ya Şirnexî Nurane Îmîr, aktîvîstê TJA, DBP, Mayê Haştîye zî tede xeylêk kesî tewrê merasîmê akerdişî bîyî. Akerdiş de girseyî govende girewte û vera sloganî vatî.

Hemvervatoxa YSPyî Çîdeme Kiliçgun Uçar bernameyê akerdişî de qisey kerd û ard ziwan ke cinîyan 8ê Adare û Newroze de vateyê xo, vengê xo, waştişê xo yê seba vurnayîşî, israrê xo yê demokrasî ardî ziwan. Uçare vat: ''Ewro her kes eşkeno dewam û tesdîqê nê israrî bivîno.''

Îmîre zî îfade kerd ke cinîyî weçînayîşan de do hesab bipersê û cinîyê kurdî do nê rejîmî bivurnê.

Peynîya bernameyî de ciwanan bi slogananê "Bijî Serok Apo” taxe de rayraşîyayîşêk kerd. Polîsan bi gazê îsotî hêrişê ciwanan kerd.

YSPyî Mersîn de zî taxa Şevket Sumerî ya qezaya Akdenîzî de buroyê weçînayîşî akerd. Hemvervatoxê YSPyî Îbrahîm Akin û Hemsereka DBPyî Salîha Aydenîz zî tede xeylêk kesî tewrê bernameyê akerdişî bîyî. 

Îbrahîm Akinî bername de ard ziwan ke weçînayîşan ra pey do cuyêka newîye dest pêbikera. 

Akinî ra dima Salîha Aydenîz qisey kerd û pare kerd ke nê weçînayîşî mabênê faşîzm û demokrasî de yê. Aydenîz vat: ''Îqtîdar wazeno pê tecrîd, şer û qeyûman şarê kurdî tecrîd bikero. La ma vera qeyûman, şer û tecrîdî têkoşînê demokrasî kenê. Ma do 14ê gulane de ser bikewê. Ewro meseleya bingeyîne meseleya kurdan. Seba ke na mesele çareser biba ganî berê Îmraliyî bêrê akerdene û Ocalan qisey bikero. Ma seba azadîya şaran û Ocalanî hê yenê.

Partîya Çepe ya Keske Konakê Îzmîrî de pê kombîyayîşêkê şarî xebatê weçînayîşî dayî destpêkerdene. Hemsereka HDPyî ya Îzmîrî Berna Çelîk kombîyayîş de bale ante ser ke cinîyê kurdî do serkêşîya weçînayîşan bikerê û do ser bikewê. Hemvervatoxê YSPyî yê Îzmîrî Mehmet Sabrî Gulî zî venga şarî da ke wa weçînayîşan de bibo muşahîd û wayîrê rayanê xo vejîyo.

YSPyî û Rêxistina HDPyî zî Erdexan de esnafî zîyaret kerdî. Tîya de agahîyî dîyayî şarî û meseleyê şarî ameyî goşdarîkerdene. Hemwelatîyan vera krîzê ekonomîkî nêrazîbîyayîşê xo mojna û vat ke ê do weçînayîşan de îqtîdarî bivurnê.