Samandagê Hatayî de bajarê xeyman ê AFADî binê awe de mend. Hewteyêk verî zî eynî çî qewimîyabi la selahîyatdaran tedbîrî nêgirewtî, coka şar reyna mexdûr bi. Şarê ke hêrsê xo ard ziwan ANFyî rê qisey kerd.

Fîlîze Başturk vat: ''Şilî varaye, xeyme ameye çi hale. Pêro çî-mî ma bi hî latim. Qet selahîyetdarêk nêame hetkarî. Ma tîya têna gelç vejenê. Ma nêzanê ça rabikewê. Hewteyêk verî ma na rewşe ciwîyayî. La qet çareyêk nêame dîyene. Ma rê konteyner lazim o.''

Suleyman Başaran zî vat: ''Înanê ke nê xeymî nayî ro, sûcdar ê. Kiştê xeyman mabênê ci ra berzêr ê, çoka awe yena zere. Seba ke no sefalet biqedîyo, konteyner hewce keno.''

Şîrîne Daduk zî vat: ''Xora ma şeş tenî zor xeyme de ca danê xo, nika zî varayîşî ra binê awe de mende. Anons kerd vanê firtina de tehlukeyê firdayîşê xeyman esto, zixm bikerê. Ma do senî bikerê? Werîkna konteynerî bibiyênî, ma hende nêqeflîyayênî.''

Sevîme Yatkin zî vat: ''Eke dewlete destê xo ma rê derg bikerdêne, konteynerê girdî bikerdêne, xeymê ma cayê berzî de ronayêne, wina nêbîyênî. Homa mela nê dejî dişmenê ma medo. Ma merdî, rijîyayî. Ma nêzanî cenazayanê xo rê bibermê, xorê biqehrîyê, se bikerê.''

Gonule Demira ke kênaya ci ya astengdar est a wina hêrsê xo ard ziwan: ''Şar xemê înan de nîyo. Selahîyetdarêk zî nêame. Senî ke ma erdlerzî de mirnayî, nika zî wazenê bimirnê. Çew nêvano şima est ê, çîn ê. Kênaya mi astendar a. Ez şewe ra xebityena. Keran nan kiştê xeyme ser ke wa firmedo. Înanê ke ma wina mexdûr kerdî, ma înan rê heqê xo helal nêkenê, guneyê ma mela milê înan de bo.''