Şaredarîya Erdîşî ya HDPyî 2019 de hetê qeyûmî ra amebî xespkerdene û Hemşaredara Erdîşî Yildize Çetîn tepişîyabî. Qeyûmî verî dezgehê cinîyan Merkezê Cuye yê Zîlane û Keyeyê Cinîyan qefilnabî.

Hemşaredara Erdîşî ya HDPyî Yildize Çeetîn derheqê weçînayîşanê pêroyîyan ê 14ê gulane û xesaranê qeyûman de ANFyî rê qisey kerd.

Hemşaredara Erdîşî Yildize Çetîn bale ante girîngîya weçînayîşanê 2023yî ser û pare kerd ke AKP do nê weçînayîşan de biqedo. Yildize ard ziwan ke weçînayîşî ra verî ê do şarî rê qala krîz, talan, zulmê 20 serran bikerê û vat: ''Nê weçînayîşî zaf girîng ê. Îqtîdarêko winayên verê ma de yo ke zerarî dano merdiman, xoza, huqûq, demokrasî û her çîyî. Vera nê îqtîdarî ganî her kes kom bibo û bi nê hawayî têbigêro.''

Yildize vist vîrî ke îqtîdarê AKP-MHPyî bi taybetî derbê giranî dayî merdimatîye, demokrasî û huqûqî ro û vat: ''Nê derban ra yew zî tayînkerdişê qeyûman bi. Qeyûman terefgîrê xo girewtî karî, projeyê ma serûbin kerdî. Qeyûman hêrişê warê cinîyan kerd. Ma soz danê ke nê waranê ke qeyûman talan kerdê, newe ra awan bikerê. Rixmê hende zeraranê qeyûman zî ma do waştişê şarê xo ser o xizmetanê xo rê dewam bikerê.''