Vîrusê Korona yo ke menga kanûne de şaristanê Wuhanî yê Çînî de vejîya werte pêro dinya de vila beno.

Rêxistina Weşîye ya Dinya (WHO) derheqê vilabîyayîşê vîrusî de qesawetê xo pae kerd û îfade kerd ke hewteyê vêrî de hûmara qurbanan do zêdêr biba.

Goreyê doneyanê Zanîngehê John Hopkinsî heta şewa çarşemeyî pêro dinya de tewr tay 926 hezar kesî 187 welatan de pê vîrusî kewtî.

Hetê hûmara nêweşan ra DYA rêzê destpêkî de ya. DYA de bi temamî 209 hezar kesî pê vîrusî kewtî.

Îtalya de tewr tay 100 hezar û 500 kesî, Îspanya de 102 hezar kesî, Çîn de 82 hezar û 300 kesî, Almanya de tewr tay 77 hezar û 500 kesî, Fransa de 57 hezar û 700 kesî, Îran de tewr tay 47 hezar û 600 kesî, Brîtanya de tewr tay 30 hezar kesî pê vîrusê Korona kewtî.

Hûmara merdimanê ke vîrusê Korona ra merdî pêro dinya de 46 hezar û 400 kesî derbaz kerd. Têna mabênê 24 saetanê peyênan de goreyê doneyanê fermîyan nêzdîyê 5 hezar kes merdî û 77 hezar kesî pê vîrusî kewtî.

Mabênê 24 saetanê peyênan de tewr zaf DYA de vîrusî gan girewt. DYA de 1306 kesî, Îspanya de 864 kesî û Îtalya de 727 kesî vîrusê Korona ra merdî.

Îtalya de menga sibate ra nata 13 hezar û 155 kesî merdî. Îspanya de zî heta nika 9 hezar û 53 kesî merdî. DYA de zî 4 hezar û 476 kesî merdî. Fransa de zî hûmara qurbananê vîrusê Korona 4 hezar û 782 kesî ya. Çîn de goreyê doneyanê fermîyan 3 hezar û 312 kesî vîrusî ra merdî.

Rojanê peyênan de yeno îdîakerdene ke hûmara raştikêne ya qurbananê Çînî zêdêr a. Radio Free Asia (RFA) yo ke hetê Kongreya DYA yeno fînansekerdene da zanayene ke Çîn de aslê xo de tewr tay 42 hezar kesî vîrusî ra merdî.

Îran de zî bi heman hewayî yeno şikkkerdene ke hûmara raştikene qurbanan û nêweşan yena nimiteme. Goreyê muxalîfa welat de 14 hezar û 700 kesî Korona ra merdî. Hukmatê Îranî zî îdîa keno ke 3 hezar û 36 kesî Korona ra merdî.