Frankfurt de Newroze bicoş ameye pîrozkerdene

Kurdîstanijan û dostanê înan Frankfurt de Newroze bicoş pîroz kerde.

Bajarê Frankfutî yê Almanya  de Newroza merkezî ya Almanya ameye pîrozkerdene. Hetê KON-MED û federasyonanê pabesteyanê ci ra 163 merkezan ra şar bi otobusan kirişîya warê Newroze.

Eyaletê NRWyî de fîrmayê otobusan pêkerdişî ra xo peyser ant. Rixmê naye şar pê trenan xo resna warê Newroze. Saetanê serê sibayî de rixmê varayîşî bi des hezaran kesan warê Newroze canêverda. Dima ra bi weşî. Kurdîstanijanê ke bi kincanê xo yê neteweyî warê Newroze xemilna posterê Rayberê Şarê Kurdî Abdullah Ocalanî û beyraqê YPG, KCK û PKKyî akerdî û bi slogananê Bijî berxwedana Kobanê", "Bijî Serok Apo" û "Bê Serok jiyan nabe" qîrayî.

Badê rêzgirewtişî hemserekanê KON-MEDî Zubeyde Zumrut û Engin Severî şar silam kerd. Hemserekan bale ante xoverdayîşê têgêrayîşê azadîye yê Kurdîstanî ser û veng da hukmatê Almanya ke wa zextê xo yê vera kurdan wedaro.

Hemserekê FEDA Demîr Çelîk zî bi nameyê Platformê Bawerîyan ê Mezopotamya qisey kerd. Çelîkî vat: ''Vera heme destkewteyanê kurdan şer ameyo îlankerdene. Seba ke kurdî azad mebê, her warê cuya açarnayo warê şerî la kurdî xoverdayîşê xo domnenê. Nika wextê azadîye yo. Îqtîdaro faşîst erlerz sey firsetî şuxulneno, wazeno kurdan erdê ci ra bikero. Seba ke şarê kurdî asîmîle bikerê, kultur û ziwanê çîn bikerê, çîyo ke destê ci ra yeno keno. Serrgêra sessere ya Pêkerdişê Lozanî de gerek ma çar parçeyan de bibê yew û semedê pawitişê ziwan, kultur û heqê xo yê cuye pîya têbigêrê. Ma semedê azadkerdişê welatê xo û cuya azade têkoşînî xurtêr bikerê.''

Dima mesajê xoverdayoxanê ke dewaya azadîye ya kurdan ra Almanya de zîndan de yê, ame wendene. Şayîye  bi muzîkî dewam kerde û  dima mesajê KCK û KJKyî ameyî wendene.  Dima zî temsîlkarê partîyanê sîyasîyan û rêxistinan Newroza şarî pîroz kerde.

Mustafa Abdullah Sultanî ke bi nameyê PJAKî qisey kerd, vat: ''Çalakîyê prostestoyî  yê vera  qetilkerdişê Jina Emînî açarîyayî şorişêkî. Emser Newroze bi ruhê  slogana Jin Jiyan Azadi yena pîrozkerdene ke bingeyê felsefeya Rayber Apoyî ya.''

Şayîya Newroze bi aktîvîteyanê cîya cîyayan dewam kerde.