Çarçewa aktîvîteyanê 25ê Teşrîna Peyêne Roja Têkoşînê Vera Şîdetê Serê Cinîyan de wekîlan ê cinîyan û Meclîsê Cinîyan ê DEM Partî verê Wezîrîya Keyeyî de eşkerayîyêke daye. Vervatoxa Meclîsê Cinîyan ê DEM Partî Halîde Turkoglu eşkerayîye de qisey kerd.

Halîde pare kerd ke ê her tewirê şîdetî teşhîr kenê û vat: ''Îqtîdarê AKP-MHPyî destkewteyanê cinîyan hedef kenê, meseleyanê cinîyan xorin kenê. Seba ke verê kişîyayîşê cinîyan bêro girewtene ganî qanûnê bitesîrî bêrê kerdene. La Wezîrîya Keyeyî paştî dana camêrdan.

Cinîyî ganî rêxistinîya xo xurtêr bikerê. Têkoşînê azadîya cinîyan xopawitişê ma yo. Her roje cînayetê cinîyan zêdîyenê. Cinîyî şîdetê ekonomîk, psîkolojîk, cînselî û fîzyolojîkî de têrî yenê. Ma do vera ney bi têkoşînê xo yê rêxistinkerdeyî xopawitişê xo awan bikerê. 

Wa bizanîyo ke têkoşînê cinîyan garantîya têdûştî û azadîye ya. Ma do 25ê Teşrîna Peyêne de serewedaritiş û sozê xo pîlêr bikerê. Ma do pîya ameyoxê azadî awan bikerê.

Polîtîkayê şerî tewr zaf cinî û domanan rê tesîr kenê. Ewro zî bi destê qeyûman cinîyî hedef de yê. Qeyûman hêverî dezgehê cinîyan qefilnayî. Ma do na dişmenîya cinîyan her ca de teşhîr bikerê.''