Goreyê Keyeyê Çimdarîye yê Heqanê Merdiman ê Sûrîye rejîmê Şamî bi paştdayîşê hêzanê hasmênî yê Rûsya mabênê 4 saetanê peyênan de şaristanê Kafranbelê başûrê Îdlîbî reyde 18 dewî û cayê mendişî girewtî binê kontrolê xo.

Hêzanê rejîmî menga kanûne de operasyonî dabî destpêkerdene. Goreyê Neteweyanê Yewbîyayeyan 900 hezar kesî nê operasyonan de neçare mendî ke warê xo ca verdê. Şerê herêma Îdlîbî de dewleta tirke paştî dana hetêk û hetê bînî de zî rejîmê Sûrîye û mutefiqê ci estê. Wezîrê Karanê Teberî yê Rûsya Sergey Lavrovî bi eşkerayîyêke pare kerd ke înan vengdayîşê adirbirnayîşî red kerd û qebulkerdişê adirbirnayîşî sey ''teslîmbîyayîşê terorîstan'' pênase kerd.