Artêşa Sûrîye bajarekê Seraqîbî vist dest. 4 rojî verê cû artêşa tirke ya îşxalkere û cerganê ci no ca îşxal kerdbi. La rojawanê Seraqîbî de şer dewam keno.

Teyara amebî warvistene

Îdlîb de bi desan leşkerê tirkî kişîyaybî û Rûsya destûrê xebitnayîşê beşêkê warê hewayî yê Îdlîbî dabi teyarayanê keşfî yê tirkî.

Şeran de 3 SÎHAyê artêşa tirke hetê artêşa Sûrîye ra ameybî warvistene. Artêşa tirke zî di teyarayê şerî yê Su-24î yê artêşa tirke vistbî war.

Sûrîye warê hewayî qefilna

Dima ke teyara kewte artêşa Sûrîye pare kerd ke sere de Îdlîb înan pêro herêmanê vakurê rojawanê Sûrîye de warê hewayî qefilnayî û vat ke ''Eke teyarayê dişmenî debikewê warê hewayî ma do înan bivisnê warî.''

Rûsya: Ma nêeşkenê garantorîya teyarayanê tirkî bikerê

Merkezê Pêkerdişan ê Terefanê Sûrîye yê Rûsya vatbi: ''Ma nêeşkenê warê hewayî yê Sûrîye de garantorîya teyarayanê Tirkîya bikerê.''

Wezîrê Pawitişî yê Tirkî Hulusî Akarî zî vizêr eşkerayîyêke daye û vatbi ke ''Nîyetê ma çin o ke ma vera Rûsya şer bikerê.'' Akarî heman vatişê xo ewro zî dibare kerd.

Putîn: Rûsya xo seba şeran amade nêkena

Serekê Dewleta Rûsya Vlademîr Putînî zî 20ê sibate de Ajnasê Rûsya TASSî reyde qisey kerdbi û vatbi: ''Rûsya xo seba şerêk amade nêkena. Seba ke şer nêro fikrê çewî çi destê ma ra bêro ma do bikerê.''

Amebi eşkerakerdene ke şerê Îdlîbî ra semed Putîn û Erdogan 5 yan zî 6ê adare de Moskova de do pêvînayîş bikerê. Medyay Rûsya pare kerd ke pêvînayîş do 'çetin' bo.

Jeffrey yeno Anqara

Pêvînayîşê Erdogan û Putînî ra verî Temsîlkaro Taybet ê DYA yê Sûrîye Jeffrey û Temsîlkaro Daîmî yê NYyî Craft do emşo bêrê Tirkîya. Derheqê nê pêvînayîşî de hema eşkerayîyêka fermîye nêameye dayene û yeno pawitene ke rojdemê pêvînayîşî Îdlîb û pêvînayîşê Erdoganî yê Moskova bibo.