13 hezar multecîyî girawa Mîdîllî ya Yunanîstan de mahsûr mendî. Seba ke bale bêra antene rewşa înan ser verê Meclîsê Almanya de bi şîarê 'Kampan veng bikerê, ca esto' 13 hezar kursîyê vengî ameyî cakerdene.
Kampa Marioyî ya Girawa Mîdîllî (Lesbos) a Yunanîstanî de 13 hezar multecîyî mîyanê şert û mercanê xiraban de ciwîyenê. Dima ke kampe de vîrusê Korona ame tesbîtkerdene, dezgehê hetkarîya multecîyan Seebrucke, See-Watch bi tagê #LeaveNoOneBehind û Campact têgêrayî.
Dezgehan seba ke 13 hezar multecîyî hetê welatanê rojawanî ra bêrê qebulkerdene, bi hawayêkê sembolîjî 13 hezar kursîyî verê Meclîsê Federalî de paytextê Almanya Berlin de cakerdî. Çalakîya bi nameyê 'Kampan veng bikerê, ca esto' de dezgehanê hetkarîya merdimîye eşkerayîyêka hempare daye û waşt ke multecîyan rê hetkarî bêra kerdene.
Dezgehan vist vîrî ke Almanya têna multecîyan ra 465 kesî qebul kerdî û vat: ''Îmkanê Almanya estê ke multecîyan bigêra. Seba ke ma naye sembolîze bikerê verê Meclîsî de dest pê çalakîye kerd.''
Hewteyê vîyarteyî de îdarekaranê eyaletanê Thuringenî û Berlinî yê Almanya dabi zanayene ke ê amade yê ke nê multecîyan qebul bikerê. Labelê hukmatê Merkele no red kerd. Kapasîteya kampa Mîdîllî 2800 kesî ya la kampe de nika 13 hezar multecîyî estê.
