Îran de dişmenîya hemverê cinî bi qanûnan ameyo dezgekerdene. Hema ke roja 25ê Teşrîna peyêne ya Mucadeleyê Şidetê Hemverê Cinî ya Dinya bena nizd, qaydeyêkê dişmenê cinî yê neweyî bale ante.

Qayde hetê Komîteya Gêrayîşî ya Eyaletê Xorasanî a Razavî ra ame vetene. Ajansê xeberan o fermî Intîhabî nûşt ke qayde klubanê gêrayîşî rê ameyo şirawitene.   

Komîteya Gêrayîşî ya Eyaletê Xorasanî a Razavî bi îdîaya seba pawitişê exlaqê cimatî talîmatê cinîyê zewejîyayeyî seba ke bieşkê xoza de bigeyrê ganî mêrdeyanê xo ra, cinîyê ezebî û yê ke 20 serrî ra qicêr ê zî ganî pîyê xo ra destûr bigîrê da. 

DIŞMENÎYA HEMVERÊ CINÎ KE DEZGE BENA

Dişmenîya hemverê cinî qanûnanê Îranî de ca gêna. Nê qanûnan de cinîyî biraştî zî tepişteyê camêrdî yan zî bendeyê ê yê cinsîyan teswîr kenê.

Mesela, domanêka 9 serrî bi fermanê pîyê xo bi zorê ê eşkena bêro zewejnayene. Na domane ganî keyeyê mêrdeyê xo de bimano, bê destûrê ê keyeyî ca meverdo û nevejîyo teber.

Madeyê 1105. yê Huqûqê Medenîyî de yeno eşkerakerdene ke keye hetê “mêrdeyî” ra yeno îdarekerdene û cinî bê destûrê “mêrdeyî” nêeşkena keye ca verdo.