Bajaranê Dusseldorf, Bremen Frankfurt, Ulm, Darmstadt Gîessen û Stuttgartî yê Almanya de çarçiwaya 25ê Teşrîna peyêne de çalakîyî ameyî viraştene.

DUSSELDORF

Bajarê Dusseldorfî yê  Alamanya de bi şîarê 'Şidetê hemverê cinî polîtîk o! Beno ke a/o ti zî bibîyêne' cinîyî vejîyayî kuçeyan. Bi seyan cinîyan bi rayîrraşîyayîşêk şidetê serê cinîyan şermezar kerd.

BREMEN

Bajarê Bremenî de zî  cinîyan mîtîngêk viraşt. Sere de alman û afgan xeylî hetan ra cinîyî tewrê ci bîyî û vera şidetê dewlet û camêrdî de hêrsê xo ard ziwan.

FRANKFURT

Bi wesîleya 25ê Teşrîna peyêne Frankfurt de zî cinîyî kuçeyan de bî. Rayberîya meclîsanê cinîyan  de rayîrraşîyayîşêk ame viraştene. Cinîyî bi sloganan û deyîranê şorişgêrî vera şidetî vejîyayî.

ULM

Bi heman waştişî Ulm de zî hetê Platformê cinîyan ra aktîvîteyêk ameye viraştene. Çalakwanan bale ante şidetê serê cinîyan ser  û ard ziwan ke ê do xoverdayîşê xo gird bikerê.

DARMSTADT

Darmstadt de zî cinîyan meydanan de vera şidet û hêrişê camêrd-dewletî de vengê xo berz kerd. Cinîyan derheqê 25ê Teşrîna peyêne de zanayîş da û vat ke xoverdayîşê cinîyan do her tim dewam bikero.

GÎESSEN

Gîessen de zî rayberîya Meclîsê Cinîyan ê Berçemî de mîtîngêk ame viraştene.  Xeylî cinîyî  yê ke tewrê mîtîngî bîyî seba girdkerdişê mucadeleyî veng da.

STUTTGART

Stuttgart de zî hetê xeylî dezgeyanê ciya-cîyayan ra aktîvîteyêk amî organîzekerdene. Aktîvîte de derheqê şidetê serê cinîyan de kayê tîyatroyî ame ramotene û cinîyan bi erbaneyen kilamê kurdkî vatî. Bado zî qiseykerdişan de bale ancîyaye cinîyan ê şorişgêran ê sey Sakîne Cansize, Fîdan Dogane û Leyla Şaylemeze û  şorişê cinîyan ê Rojawanî ser.