Ame îdîakerdene ke Hurîye Uçar (38) a ke herêma Tempelhofî ya paytextê Almanya Berlin de mendêne bînşewe qatê 7. yê bînaye ra xo eşt war û xo kişt.

Cenazaya Uçare ameye berdene bi nêweşxaneyî netîceya cigêrayîşî ra dima cenazaya Uçare do bêra erşawitene Bîrecîk.

Dezgehê cinîyan ê kurdan DESTAN û embazê nêzdî yê Uçare vat ke keye û kekê Uçare tedaya aye kerdêne û înan nêwaştêne ke Uçare nîşan bikera.

Uçare cinîyêka kurde bîye ke herême de ameyêne heskerdene.

'Kiştiş û xokiştişê cinîyan polîtîk ê'

Meclîsê Cinîyan ê DESTANî, BINEVŞ EDESA (Meclîsê Cinîyan ê Êzidîyan), Meclîsê Cinîyan ê Cuye, Flamingo E.V. derheqê babete de eşkerayîyêka hempare weşanaye.

Eşkerayîye de ame vatene: ''Kiştiş û xokiştişê cinîyan polîtîk ê. Semedê nê kiştişan û xo kiştişan şer, xizanîye, teda, bêhêvîtîye, sîstemê pederşahîye yê. Mesuldarê nê çîyan zî dewleta bi zîhnîyetê serdestîya camêrdan o. Ma namusê kesî nîyê. Şima nêeşkenê derheqê beden, ruh û cuya ma de bire bidê. Hurîye seba ke bêçare ameye veradayene xo kişt. Ma waya xo xo vîrî ra nêkenê û do nêkerê. Ma do vera qirkerdişê cinîyan bêveng nêmanê.''

Vengdayîş

Eşkerayîye de venga pêro dezgehanê cinîyan û hêzanê demokratîkan ame kerdene ke wayîrê cenazaya Hurîye Uçar bivejîyê.