Rêxistina Gizingî ya Şarezorî bajarekê Warmawa de seba cinîyanê nêwendeyan kursê perwerdeyî da destpêkerdene. 17 cinîyê ke serrê înan mabênê 35-55 de yê û nêeşkîyayî şorê dibistane xîret kenê ke nuştiş û wendiş bimusê.

Perwerde 3 mengî yo ke dewam keno. Kursîyerê cinîyî hewteyêk de 3 rojan yenê tewrê dersê kurdkî benê.

Kursîyere Leylê Mihemedîya 48 serre îfade kerd ke aye bi waştişê xo dest pê perwerdeyî kerd û vat: "Seba ke ez  wendiş musaya ez eşkena hûmara telefonan ezber bikera û bi hawayêkê asan bazarîye bikera. Domanê mi zî hetkarîya mi kenê. Ez kêfweş a ke nusena û wanena. Wexto ke ez doma bîye mi zaf waşt ke ez şora dibistane la nêbi. Ez ciwanan ra wazena ke wendişî ra fek vera nêdê. "

Serekê Rêxistina Gizingî Newzad Seîdî derheqê kursan de qisey kerd û vat ke armancê înan no yo ke kesê nêwendeyî nêmanê. Seîdî wina dewam kerd: "Cinîye bihewes dest pê perwerdeyî kenê û zaf xîret kenê."