Qezaya Çinarî ya Amedî de zî cinîyê karkerê ke pembûyan arê danê rixmê zehmetîya karê xo nêeşkenê heqê keda xo bigêrê.

Karkerê ke şefeq ra dest pê roje kenê, heta saetanê şanî serê zîyanî de yê. Qezaya Çinarî ke zîyan de tewr zêde karkerê cinî estê, nê karî ra ber nêeşkenê çîyêkê bînî bikerê. Coka Çinar de cinîyî bi karê ramitişî eleqedar ê. Nînan ra yewe zî Hedîye Gunduz (23) a.

Hedîye wina qal kerd: "Ma 5ê sibayî de dest bi roje kenê û heta 5ê şanî serê zîyanî de yê. Ma nika peme aşêf kenê. Gama aşêf qedîya narey zî ê destan dest pêkenê. Heta menga êlule dewam keno. Menga êlule de zî ma peme kom kenê, heta menga teşrîna peyêne. Mi verê karê xo hes kerdêne, la nika hes nêkena. Mi vat, ez o çend serrî bi xebita la bi serran o xebitîyena.  Xeylêk germ o û tîje dana sereyê ma ro. Emsar semedê varan nêvara, hem zî ziwabîyayîş esto tesîr hîna zêde kerd. Her çiqas semedê ma zehmet bo zî ma semedê xebate mecbûr ê. Kesêk nê şert û mercê xidarî de nêeşkeno bixebitîyo la semedo ke ma debara xo bikerê ma her serre zehmetî ancenê."

Halîme Gultekîn (25)a ke nêzdîyê 17 serrî yo nê karî kena vat: "Ma bi saetan serê lingan de yê, coka paşta ma zaf dejena. Sewbîna na tîje xeylêk zor dana. Awa serdine zî çin a. Heta reyan awe zî çin a. Semedê prosesê pandemî kar çin o. No zî beno sebeb ke ma hetê ekonomî ra nêeşkenê kar bikerê û debara xo bikerê."

Semanur Gunduz (20) zî bale ante ser zehmetîya karî û wina vat: "Karê ma rastî de zî xeylêk zor o. Pêroyî cuya ma wina derbas bena. Ma tîya zî bi xeyrê embazanê xo wextê xo derbas kenê. Têkiliyê ma yê embazî tay bo zî karê ma weş keno. Cayê ma de mêrden ra zêdeyêr, cinîyan danê xebitnayene. Coka kênayan nêşawenê mektebe. Ma tûtîya xo ra dest pêkerd, heta nika zî dewam keno."

Sultan Aydin (19) vat: "Her serre eynî karî kenê. Emsar zî semedê ke erd wişk bîyo û varan nêvara peme zî zêde nêvirazya û xişn nêbî. Sewbîna emsar xeylêk germ bi û tewr zêde germ bo. Semedê ke ziwabîyayîş esto û varan nêvara rewşe tewr zehmet bî."

Tewr peyîn Şîlane Tunç zî vat: "3 serrî yo ez yena serê zîyanan. Reyan sebra ma zî nîna. La semedê heqdestê xo û debara xo ma mecbur ê ke nê karî bikerê. Xêrcê nê karî çîyêk destê ma ra nîno. Emsar awe zî çin a. Kar ra nêbîne mi waştêne ke biwana. La çi heyf tîya xeylê kesî kênayan nêdanê wendiş. Yan serê zîyanî de xebityenê yan zî keye de karê keyeyî kenê."