Xeylî welatanê dinya de cinîyî hadreyîya vejîyayîşê meydanan ê 25ê Teşrîna peyêne Roja Paştîdayîş û Mucadaleyê Mîyanneteweyîye ya Vera Şîdetê Serê Cinîyan kenî.

Hemsereka  Platformê Cinîyan ê Dîcle Amedî  (DAKP) Bahar Karakaş Uluge muhîmîya roja 25ê Teşrîna peyêne ser o qisey kerd.

Uluge  ard ziwan ke cinîyî hendî  hîna bihêz û birêxistin î û best pa: ‘‘Bi mîlyonan cinîyî hemverê bêseypêyîye û nîjadperestîye de mucadele kenî. Ma sey cinîyî paştîdayîşê mîyanneteweyîye û xo ra hêz genî. Cinîyî sey 100 serre cuwa ver ewro zî vera neheqîye xoverdayîş de yê.’’

Uluge vist vîrî ke bingeyê ronayîşê sîstemê dewlete de şîdetê vera cinîyan esto û va: ‘‘Hemverê cinîyan de mabênê dewletan de her wext pêkerdişêk esto. Nê pêkerdişî ke nimite yî ge-ge eşkera vera cinîyan yenê dewrefînayene. La ça ke şîdetê dewlete û camêrdî esto cinîyî zî xoverdayîş de yê. Mucadeleyê cinîyan ke cayanê tengan de destpêkerd ewro heremanê miyanneteweyîye de hîna bihêz hetê mîlyonan cinîyan ra yeno dewamkerdene. Ez zî bi na wesîleya heme cinîyan ê Amedî dewet kena ke wa Platformê Cinîyan ê Dîcle Amedî de ca bigêrî.‘‘

Uluge qiseykerdişê xo rê wina dewam kerd: ‘‘25ê Teşrîna peyêne roja destpêkerdişê mucadeleyê hîrê wayan ê bi nameyê Patria Mercedes, Minerva Argentina û Maria Terasa yê vera Cumhurîyetê Domînîkî ya. Mucadeleyê nê wayan ê vera hukmatê  dîktatorî yê Rafael Leonidas Trujilloyî bîyo sembolê na roje. Rayberîyê wayanê Mirabelî de mucadeleyê azadîye ke dest pêkerd heme welatan rê vila bi û bi têgêrayîşê serwedartişî.

 25ê Teşrîna peyên a 1960î de wayê Mirabelî hetê leşkeran ra raştê tecawuzî ameyî û ameyî qetilkerdene. No qetlîam sey qezaya trafîkî ame ramotene la hêrsê şarî vera nayî zêdîya. Qetilkerdişê wayanê Mirabelî ra dima serêk cuwa pey hukmatê dîktatorîye yê Refeal Trujilloyî zî rijîya.

Serra 1981 de Amerîkaya Latînî de cinîyan 25ê Teşrîna peyêne sey Roja Paştîdayîş û Mucadaleyê Mîyanneteweyîye ya Vera Şîdetê Serê Cinîyan îlan kerd û Serra 1999î de hetê Yewîya Mîletan ra zî ame qebûlkerdene. Mucadeleyê wayanê Mirabelan heme cinîyan ê dinya rê bi umîd.‘‘