Roja 25ê Teşrîna peyêne ya Roja Paştîdayîş û Mucadeleyê Mîyanneteweyîye ya Vera Şidetê Serê Cinîyan a Dinya bena nizdî.  Serranê peyênan de cayê ke cinîyan rê her qêde şidet yeno kerdene ra cayêk zî Sûrîye ya. Şerê 7 serran de cinîyan şideto ke nêdî nêmend.

Rayberîya Yewîya Pawitşê Cinîyan (YPJ) de Rojawan de mucadeleyo ke hemverê heme şidetan de ame dest pêkerdene heta Vakur û Rojakewtena Sûrîye vila bi û rêxistinêka girde ya cinîyan ameye ronayene.

Bi hezaran cinîyî tewrê mucadeleyê YPJî bîyî û bi hezaran zî Vakur û Rojakewtena Sûrîye de kampan de ameyî cakerdene. Nê kampan ra yew zî ya Eyn Îsa ya. Bajaranê cîya cîyayan ê Sûrîye û Iraq ra nizdê 10 hezaran cinî û domanî ke şidet û mergî ra remayî Kampa Eyn Îsa de manenî.

Meclîsê Sivîlî yê Reqa Banê Cinîyan ê Kampa Eyn Îsa de seba paştîdayîşê cinîyan gureyeno. Îdarekaranê Banê Cinîyan ê Kampa Eyn Îsa ra Bûşra Eyaşe ard ziwan ke cinîyê ke kampe de yê zafê înan raştê şidetî ameyî.

Eyaşe şideto ke nê cînîyan dîyo sey wextê cahîlîye name kerd û va: ‘‘Nê cinîyan her qêde şidet dîyo. Şideto tewr pîl na herre de ame cuwiyayene. Senî ke wextê cahîlîye de cinîyî ganî ganî ameyêne derfinkerdene û recmkerdene ewro zî no şidet bi ûsulanê cîya cîyayan yeno kerdene.‘‘

Eyaşe qiseykerdişê rê wina dewam kerd: ‘‘Reqa ra 3 hezar û 115, Dêra Zorî ra 8 hezar û 73, Halep ra hezar 56, Îdlîb ra 48, Hama ra 64, Humus ra 162 û Iraq ra 518 kesî ke kampe de mananî her hetî ra paştîdayîş dîyeno înan. Ma tîya de hetêk ra darbanê cinîyan pêşenî û hetêk ra zî seba ameyîşê înan xelisnayîşî paştî danê înan.''