Sey xeylî cayanê dinya Dêrsim de zî cinîyî hadreyîya aktîvîteyanê 25ê Teşrîna peyênê kenî.

Platformê Cinîyan ê Dêrsimî da zanayene ke ê emser do bi şîarê ‘‘Ma hemverê şidet û zextî de heqan û cuyanê xo ra fek vera nêdanî, mucadele kenî‘ bivejî meydanan.

Rayberîya Platformê  Cinîyan ê Dêrsimî de ewro do cinîyan ê tewqîfkerdeyan  rê  kartî bêrî şawitene, şewa îneyî derheqê cinîyan de filmêk bêro seyrkerdene, roja şemeyî panelêk bêro viraştene û 25ê Teşrîna peyêne de zî eşkerayîya çapemenîye bêro viraştene.

Endama Platformî û sereka Komela Paştîdayîşê Cinîyan a Yenîgunî Fîdan Demîre seba tewrbîyayîşê aktîvîteyan veng da cinîyan û waşt ke wa vera şîdet û zextî heme cinîyî vejîyê kuçeyan û wayîr heqanê xo rê bivejîyê.

Demîre da zanayene ke Dêrsim de se ra 70 cinîyî şidet vînenê la no şidet yeno nimitene û va: ‘‘Dêrsim de cinîyan ser o polîtîkaya taybete yena bicardene. Bi ters, zext û şidetî wazenê ke cinîyan kole bîkerî. Ganî vera hêrişê serê cinîyan heme cinîyî vejîyê meydanan û mucadele bikerî.‘‘