Çarçiwaya akîtîvîteyanê 25ê Teşrîna peyêne ya Roja Paştîdayîş û Mucadeleyê Mîyanneteweyîye ya Vera Şidetê Serê Cinîyan ya Dinya de xeylî weletanê Ewropa de cinîyî meydanan de bîyî.

PARÎS

Paytextê Fransa Parîs de Însîyatîfê Noustoutesî ke tede 70 rêxistinê cinîyan ca gênî aktîvîteyêk organîze kerde. Bi seyan cinîyî vejîyayî meydanan û vera şidetî mesajê xoverdayîşî da.

RENNES

Bajarê Rennesî de zî rayberîya Meclîsê Cinîyan ê Zîne de çalakîyêk ameye organîzekerdene. Çalakwanan bi slogananê ‘‘Jin, Jiyan, Azadî” û “Biji Serok Apo” yî rayîrraşîyayîşêk viraşt.

MARSÎLYA

Bajarê Marsîlya de zî Meclîsê Cinîyan ê Arîn Mîrkane aktîvîteyêk organîze kerde. Çalakwanan fotografê Rayberê Şarê Kurdî Abdullah Ocalanî û hîrê cinîyê kurdan ê şorişgêrî yê ke Parîs de ameybî qetilerkedene kiriştî û mesajê xeta înan de şîyayîşî da.

LÎMASOL

Bajarê Limasolî yê Kibrisî de zî bi heman waştişî çalakîyêk ameye viraştene. Rayberîya TJK-Eyî de xeylî cinîyî ameyî têhet, rayîrraşîyayîşêk viraşt û dima zî  verê banê şaredarîye de bi eşkerayîyêk da zanayene ke cinî vera şidetî bêveng nêmanenî.

ROMA

Paytextê Îtalya Roma de zî cinîyan ê kurdan û îtalyanan çalakîya hempare viraşte. Cinîyan hemverê qirkerdişê cinîyan de bale ante muhîmîya xoverdayîşê cinîyan ser.

KOPENHAG

Bajarê Kopenhagî yê Danimarka de zî cinîyî meydanan de bî. Cinîyan vat ke şidetê serê cinîyan polîtîk o la ê teslîmê şidetî nêbenî û do mucadeleyî gird bikerê. Cinîyan çalakîya Leyla Guvene zî silam kerde.

CENEVRE

Bajarê Cenevre yê Swîsre de zî bi seyan cinîyî ameyî têhet û şidetê serê cinîyan protesto kerd. Qiseykerdişan de ame vatene ke qet heqê kesêk çîn o ke mudaxeleyê cuya cinî bikero. Cinîyî çi biwazî ê kenî û bi mucadeleyê hemparî do qezenc bikerê.

ZURÎH

Bajarê Zurîhî de zî kuçeyan de vengê “Jin, Jiyan Azadî” erd û asmîn zilzilnayî. Cinîyan bale ante rindîya mucadeleyê cinîyan ser û vat ke dinya bi nê mucadeleyî rind a. Çalakwanan vera zihnîyetê faştîstî yê camêrd-dewletî hêrsê xo ard ziwan û vat ke ê do bi mucadeleyî azad bibê.

Reyna bajaranê Friborug û Lozanî de zî çalakîyê 25ê Teşrîna peyêne ameyî viraştene.