Vervatoxa Meclîsê Cinîyan ê DEM Partî Halîde Turkoglu merkezê partîya xo de, bi kombîyayîşêkê çapemenîye startê startê kampanyaya ''Ma cuya azad û têdûşte de isrardar ê, ma xo rêxistin kenê'' da.

Halîde Turkoglu hêverî serrgêra Şorişê Rojawanî fîraz kerde, hêrişê îşxalî yê vera Başûrê Kurdîstanî şermezar kerd û seba qedînayîşê hêrişan veng da.

Halîde dîyar kerd ke mîyanê 6 menganê peyênan de 205 cinîyî hetê camêrdan ra ameyê qetilkerdene. Halîde bale ante sereraştkerdişê Pakêta Qanûnan a 9ine ser û vat: ''Îqtîdar meseleya peynameyî de wazeno cinîyan teber bikero, camêrdan sey serkêşanê keyeyî name bikero û cinîyan dîzayn bikero.

Ma do bi kampanyaya xo cinîyanê Kurdîstanî, Tirkîya û Rojhelatê Mîyanênî û dinya de bêrê têhet. Ma do vera şerî îtîfaqê tewrê pîlî awan bikerê. Cinîyî do bi îtîfaq û têkoşînê hemparî vera rejîmê qeyûman têbigêrê. Ma do rayîr nêdê polîtîkayanê xespkerdişê destkewteyanê cinîyan. Ma do her şaristan de vera qeyûm û şerî, bi rêxistinkerdişî têkoşîn bikerê û çalakîyanê xo pîlêr bikerê.

Kurdîstan de vera cinîyan polîtîkayê şerê taybetî yê giranî yenê kerdene. Ma sey cinîyanê Kurdîstanî û Tirkîya vera nînan her taxe de rêxistinîya xo pîlêr bikerê. Ma do atolyeyanê xopawitişî abikerê û rayîr nêdê qetilkerdişê cinîyan û madeyanê tîryakî. Ma do meclîsanê xo yê cinîyan xurtêr bikerê, sîstemê hemserekîye bipawê. 

Çarçewa kampanyaya xo de ma armanc kenê ke Konferansê Rêxistinîya Cinîyan ê Yewinî virazê. Ewro ra heta 5ê tebaxe şaristanan de, 23yê tebaxe de Anqara de Komxebata Rêxistina Cinîyan û mabênê 12-13ê êlule de zî konferansê xo bikerê. Kampanyaya ma 6 mengan do dewam bikera.

Bijî piştevaniya jinan, Jin jiyan azad.''