Îqtîdarê AKP-MHPyî pê şerê taybetî wazeno şexsê cinîyan de komelî teslîm bigêro. Goreyê doneyanê Platformê 'Ma do verê kişîyayîşê cinîyan bigêrê' emser 217 cinîyî bi hawayêkê şikdarî merdî û 280 cinîyî kişîyayî.

Cînayetanê vera cinîyan de dewlete camêrdan pawena. Çawişo pispor Musa Orhano ke Îpeke Er qetil kerde, çawişo pispor Alî Dalgirano ke Surme Înce qetil kerde, gardîyan Halîl Îbrahîm Serto ke Wan de bi wesayîtî Dîlane Toptaş qetil kerde, polîs Ercan Uysalaro ke cinîyêke rê fuhuş ferz kerd, Zainal Abarakov û babîyê ci polîs Engîn Y. yê ke mesuldarê vînîbîyayîşê Gulîstane Doku yê hema zî serbest ê û derheqê înan de birêke nêdîyaye.

5ê çeleyê 2020î ra nata wendekara Zanîngehê Munzurî Gulîstane Doku ra xeberêke nêna girewtene. Rixmo ke serebûtî di serrî xo pey de verdayî Serdozgerîya Komare ya Dêrsimî derheqê tehqîqatî de gamêke nêeşte. Rêxistinanê komelê sivîlî û keyeyê Dokuyî bale ante 'kiştişê plankerdeyî' ser û ê wazenê ke tehqîqat bi nê hawayî bêro kerdene. La sere de dozgerî, temsîlkarê dezgehanê fermmîyan giranîye danê îdîayanê 'xokiştişî' ser. Rixmo ke vînîbîyayîşê ci ra rojêke verî Gulîstane Zainal Abarakovî reyde nîqaşêk kerdbi, no çi hetê kamerayan ra eyd bibi, keyeyê Abarakovî de cigêrayîş nêame kerdene û o nêame destbendkerdene. Destûr nêdîya ke o keyeyê xo bihewilno.

Serekê Komeleya Paştdayîşê Cinîyan a Yenîgune Çagla Yolaşan pare kerd ke mergê şikdarî yê cinîyan û kişîyayîşê cinîyan zaf manenê pê û vat: ''Peyê nê kerdişan de camêrdî estê ke tim pawîyenê. Hem kiştişê cinîyan hem zî mîyankerdiş û pawitişê kerdoxan heman çimeyî ra yenê. Serebûtê Gulîstane Doku nînan ra cîya nîyo.''