Koordînasyonê KJKyî bi eşkerayîyêke şexsê Zîlane (Zeynepe Kinaci) de şehîdê Menga Hezîrane yad kerdî.

Eşkerayîye wina ya:

''Embaza ma Hanime Yaverkaya 28ê hezîrana 1985î de tewra karwanê şehîdan bîye û a bîye cinîya şehîde ya verêne.

 Embaza ma Zîlane gulana 1996î de vera suîkastê serê Rayber Apoyî çalakîyêka fedayîye kerde û şehîd bîye. 

Embaza ma Sema Yuce 17ê hezîrana 1998î de şehîd bîye ke aye bi çalakîya xo ya fedayîye cewab da ferasetê kanwazî. 

Embaza ma Gulane Garzan (Fîlîze YerlîkayaI seba fedayîtîye biba xetêke û têkoşînê ma bibo rêxistinkerde rolê serkêşîye ard ca coka bîye hedefa dişmenî û xeta tasfîyekeran. A 7ê hezîrana 2002yî de ameye qetilkerdene.

Embaza ma Rûkene Herekol (Emîne Tayboga) sey endama Tabûrê Bêmergan ê Şehîde Zîlane 26ê hezîrana 2006î de Antalya de çalakîya xo ya fedayîye de şehîd bîye.

Rojhelatê Kurdîstanî de embaza ma Zîlane Pepûle (Latîfe Selamet) Merîwan de 30ê hezîrana 2006î de bi hawayêkê birîndarî kewte destê Îranî, îşkenceyê giranî dîyî la heta nefesê xo yê peyênî xo ver da.

Hezîrana 2016î de Mûsil de 19 cinîyê êzidîyî hetê DAÎŞî ra seba ke teslîmîyetî qebul nêkerdêne ameyî vêşnayene û şehîd bîyî. 

Fermandaranê serkêşan ra û Endama Konseya Rayberdişî ya KJKyî Leyla Agirî (Filîze Aslan) 23ê hezîrane de şehîd bîye.

Hezîrana 2020î de Rojawanê Kurdîstanî de embazê ma Hebûne, Zeyra Berkel, Dayîke Emîne û par zî embazê ma Reyhane û Yusra Derwêş hetê dewleta tirke ya qirkere ra ameyî hedefkerdene û şehîd bîyî. 

Endama Meclîsê PAJKî Bêrîvane Zîlane (Hatîce Hezer) sey fermandarêka pîle Warê Rayberîye ra heta her parçeyê Kurdîstanî şer kerd û hezîrane de şehîd bîye.

Embaza ma Raperîne Amed (Delale Azîzoglu) 1992 ra heta şehadetê xo xeta Zîlane de têkoşîn kerd. Aye karanê awankerdişê sîstemê konfederalî yê demokratîke de kedê pîlî dayî û erkê xo ser de şehîd bîye.

Embaza ma Şehrîstane Asmîn warê çapemenîya azade de bi serran kede daye û bîye şehîdêka hezîrane.

Hezîrane menga şehîdanê fedayîyan a. Têkoşînê azadîye ewro Zap, Metîna û Avaşîn de û her ca de dewam keno. Çalakîyê embazanê ma Rûkene û Sara zî rewşa na xete ya newî ya. Têkoşînê ma do hîna zaf vila bibo. Xeta ma ya Zîlane do xo pîl bikera, serkêşa her dewrî baferna û biba garantî û ronayoxa esase ya sîstemê azadîya cinîyan.

Rayber Apoyî seba embaze Zîlane vatbi 'Ganî ma verê aye de sereyê xo bîyarê war. Adirê Zîlane de her çi yeno afernayene.' Rayber Apoyî bi averberdişê têkoşînî cewab da perwerîya şehîdan. Perwerîya bi şehîdan, perwerîya bi Rayber Apoyî ya. Erkê ma yo ek ma vîrameyîşê şehîdan fam bikerê û bîyarê ca.

Sey KJKyî ma veng danê ke ma şehîdan fam bikerê, bi çalakîyanê xo erjanê embaze Zîlane biresnê asta tewr berze û wayîrê mîrasê şehîdan vejîyê. Ma mektubanê şehîdanê xo yê serkêşan biwanê, xeta înan a têkoşînî fam bikerê. Ma nê rojan bikerê rojanê peydakerdişê rayîrê cuye yê sey Zîlane û Sema.

Cuya azade cuya manadar a. Ma seba ke bibê wayîrê çalakîyanê ke cuye manadar kenê têkoşîn bikerê. Ma îdîaya xo ya cuya azade pîlêr bikerê. Sey KJKyî ma venga cinîyan danê ke keye, kuçe, dibistan, kargeh, ko, çeper, şaristanan û her cayî de seba famkerdişê cuya Zîlane, têkoşînê azadîye pîlêr bikerê. Ma venga cinîyan ê ciwanan zî kenê ke ala cuya Zîlane hîna zaf berz bikerê.''