Konferansê HDKyî yê Cinîyan: Leyla Guvene rayîrê ma kena roşnî

Meclîsê Cinîyanê HDKyî, konferansê cinîyan da destpêkerdene. Hemvatoxê HDKyî Gulîstan Kiliç Koçyigite  û hemsereka Pêroyî ya HDPyî Pervîn Buldane Leyla Guvene rê silamî erşawitî.

Konferansê Cinîyan ê 9ine yê Meclîsanê Cinîyan ê Kongreya Demokratîk a Şaran dest pêkerdHemvatoxê HDKyî Gulîstan Kiliç Koçyigite  û hemsereka Pêroyî ya HDPyî Pervîn Buldane ya pîya  xeylî cinîyî beşdarê konferansî bîyî. Salona konferansî de posterê Leyla Guvene û pankartê ‘‘Tecrîtî rê nê, veng bide xoverdayîşo  ke cuye paweno“ ameyî daliqnayenê.

FÎLÎZ KERESTECÎOGLU

Konferans de qiseykerdişo verên hetê parlamentera HDPyî ya Enqere Fîlîz Kerestecîoglu ra ame kerdene. Kerestecioglu seba ke beşdarê konferansî bîya zerrîweşîya xo nîşan daye û va: ‘‘HDP seba ke Tirkîya de sey merdimî bi haştîye biciwîyîme ameya ronayene. Şertê ewroyî ke wina nêbîyenê, rayîrê xo cayêko bîn de hîna hîra ramitene. Labele ey rojî zî dûrî nîyê û ma do hîna zêde kesan bigîrê xo het.‘‘

GULÎSTAN KILIÇ KOÇYÎGÎTE

Gulîstan Kiliç Koçyîgîte zî Leyla Guvene rê selam erşawit û va: "Faşîzmî pêroyê welat kerdo tarî û bi nameyê merdimîye, haştîye qet çîyêk nêverdayo. Dewrêko winayên de meşaleya azadîye û haştîye ya ke hetê Leyla Guvene ra ameya vêşnayene rayîrê ma kena roşnî.Hevala ma Leyla musnayo ma ke ganî no tarî de ma teslîm mebîme û xoverbidîme. Ma zî vanîme ke mucadeleyê to ê ma yo û tecrît ganî hema bêro wedartene."

'MEŞALEYA DESTÊ LEYLA GUVENE RAYÎRÊ MA KENA ROŞNÎ

Koçyîgîte qiseykerdişê xo de bale ante prosesê şerî ser û va: ‘‘Bi prosesê şerî Rayberê Şarê Kurdî Abdullah Ocalanî ser o tecrîdêko giran ame ronayene. Serra 2016î ra nat Ocalanî ra xebere nêna girewtene. Vanê ma bi prosesê haştîye kenîme vîndî û vanê rotaya ma şer û tecrît o û wazenê ke ma her yew ney polîtîkayan ver vileyê xo binamnîme û bibîme teslîm. 2012î ra na het ma vera polîtîkayanê ser cinîyan ê AKP mucadele kerdo û 2015î ra na het zî vera faşîzmî mucadele kenîme.‘‘

PERVÎN BULDANE

Pervin Buldane zî wina qisey kerd: "Bi taybetî embaza ma Leyla Guvena hêcaye 66 rojîyo ke grevê vêşanîye de ya û vengê aye dêsanê hepisxaneyan ra vejîya teber û ez ney xoverdayîşî ver bi hurmet vileyê xo kena çewt û silamanê xo erşawena."

Buldane va Leyla Gûvene bale anta problemê tarîxî û komelkî ser û wina dewam kerd: "Birêz Ocalanî 3,5 serrî naye ra ver bi yew prosesî  musna ma ke fikrê xo yê  ameyîyê welatî, haştî û azadî û demokrasîyî çiqas muhîm ê.Tecrît pêroyê waştoxanê haştî û demokrasîyî rê yeno kerdene. Ma cinîyî seba ke tecrît bêro wedartene eke pîya hereket mekerîme, vengê Leyla Guvene rê ke mebîme veng, vengê aye ke meheşnîme û dest ci rê mekîme derg, peynîya ney rojanê tarîyan nêna û sîyaseto demokratîk hîna zêde yeno hinciqnayene. Ma Amed de da îspatkerdene ke ma cinîyî wayîrê hêzê  û weçinîyayîşê cayî de ganî ma hêzê xo hîna baş nîşan bidîme. Serî de Leyla Guvene, pêroyê hevalanê xo yê hepisîyan rê silam û heskerdişanê xo erşawena û vana seba azadîya înan ganî ma hîna zêde bihêz hereket bikê“