Çarçiwaya akîtîvîteyanê 25ê Teşrîna peyêne ya Roja Paştîdayîş û Mucadeleyê Mîyanneteweyîye ya Vera Şidetê Serê Cinîyan ya Dinya de xeylî bajaranê Vakurê Kurdîstanî de cinîyî meydanan de yê.

DÊRSIM

Dêrsim de rayberîya Platformê Cinîyan de Meydanê Seyîd Rizayî de eşkerayîya çapemenîye ame viraştene. Cinîyan fotografê Sîsê Bingola 85 serrî ya  ke rixmê xeylî nêweşîyanê ci nezaret de yena tepiştene, kiriştî û ard ziwan ke ê verê dîktatorîye de çok nêdanê.

ÊLÎH

Êlîh de Meclîsê Cinîyan ê HDPyî bi wesîleya 25ê Teşrîna peyêne eşkerayîya çapemenîye viraşte. Aktîvîstanê TJA û Parlamentera HDPyî Ayşe Acar Başarane ya pîya xeylî kesî tewrê ci bîyî.

Çalakîya ke binê ablûqaya polîsan de ameye viraştene de çalakîya Leyla Guvene ame silamkerdene û azadîya Rayberê Şarê Kurdî Abdullah Ocalanî ameye waştene.

ŞIRNÊX

Meclîsê Cinîyan ê HDPyî yê Şirnexî zî çarçiwaya 25ê Teşrîna peyêne de verê banê partî de çalakîyêk viraşte.  Çalakîye de hêrişê camêrd-dewletî yê serê cinîyan ame potestokerdene. Cinîyan bi eşkerayîyêk da zanayene ke rixmê heme hêrişan cinîyî xoverdayîşê xo ra pey ser game nêerzene û ê do mucadeleyî hîna xurt bikerê.

RIHA

Riha de  zî Platformê Cinîyan ê Bajarî bi eşkerayîyêka çapemenî bale ante hemverê hêrişê serê cinîyan de muhîmîya xoverdayîşê cinîyan ser. Parlamentera HDPyî ya Riha Ayşe Surucu û Parlamentera Stenbolî Oya Ersoye ya piya îdarekarê KESK, DBP, ÎHDyî û Mayê Aşîtî tewrê ci bîyî. Cinîyan  vist vîrî ke hukmat wazano ke cinîyan keyeyan rê heps bikero û vat ke  ma azadîya xo ra fek vera nêdanî.

SEMSÛR

Platformê Cinîyan ê Semsûrî zî bi heman waştişî eşkerayîyêk daye. Cinîyan da zanayene ke ê do bi mucadeleyî azad bibê û peynîya camêrdê serdestî bîyarê. Çalakwanan bale ante qewimîyayîşanê Kurdîstanî ser û vat ke ê rixmê heme qetilkerdişan milê xo çewt nêkenî û mucadeleyî rê dewam kenî.

WAN

Wan de zî çarçiweya aktîvîteyanê 25ê Teşrîna peyêne de hetê Platformê Ah Tamara ra rayîrraşîyayîşêk ame organîzekerdene. Rixê mudexeleyê polîsan cinîyan pey ser game nêeşte û heta Parka Aşîtî a Musa Anterî rayîrraşîyê û tîya de eşkerayîyêk daye. Cinîyan pankartê ‘Heskerdişo ke mirneno ma nêwazenî‘ û ‘ Xopawitiş heq o‘ akerdî û  bisilogana ‘Cinî, Cuye, Azadîye vera zîhnîyetê faşîstî bale ante xoverdayîşê cinîyan ser.