Pedê hîjyenîkî yê ke dewlete sey 'luksî' vînena û tira se ra 18 bacê KDVyî gêna wextê peyênî de zêdînayîşê vayan ra xeylêk cinîyî hînî nêeşkenê bihêrînê. Nika paketêka pedanê hîjyenîkan 80 TL derbaz kerd.

Cinîyî îfade kenê ke pedê hîjyenîkî hewcedarî yê û vera rewşa nêrazîbîyayîşê xo mojnenê.

Burcuya ke karmend a pare kena ke rojanê reglî de her çiqas a pakêta tewr ercane zî bigêra 100-150 lîrayan dana û wina vana: ''Faturaya ceyranî, gazê xozayî bîye vay. Zamo ke meaşê mi rê ameyo kerdene zamê pedan û faturayan rê nêvejîyeno. Merdim eşkeno ceyran û gazê xozayî tay bişuxilno la ped wina nîyo.''

Ayfera ke rojnameger a û lajê ci yo qij esto ana ziwan ke ped û bezê domanan hewcedarîyê serekî yê. Ayfere vana: ''Ped û bezanê domanan ra se ra 18 bacê KDVyî gênê. Nê çîyî hewcedarîyê bingeyî yê. Her menge ganî merdim 250 lîra bido nê çîyan. Ez derûdorê xo rê zî vana ke wa hînî bezan kom bikerê.''

Rosaya ke fîrmayêka înşaatî de mîmar a vana: ''Cuye ma roje bi roje hîna bena xirab. Nika zî feqîrîye bena vila. Coka ganî ma paştdayîşî geşêr bikerê.''

Burcuya ke dibistane de mamosta ya vana: ''Seba ke enflasyon vera zêdîyeno zêdîyayîşê meaşan kar nêkeno. Pedî hewcedarîyanê serekeyan ra yew o û her roje vaya ci zêdîyena. Ganî vaya pedan bêra betalkerdene. Ma wazenê wa pedî belaş bibê.''