Rojnamegere Sara Xwînda qalê şahîda çapemenîya azade Nûjîyan Erhane kerd. Xwînda ard ziwan ke, reya verêne Nûjîyan Erhane Zagrosan de şînasna û vat, “Ma pîya Avaşîn de raywanîye kerde. Mi reya verê a dî bi, la a zaf zerrî û can ra bîye. Seba amadekerdişê  belgefîlmê Sakîne Cansize amayebî Zagrosan.”

Zagrosan ra dima verê xo da Şengalî

Xwînda ard ziwan ke Zagrosan ra dima aye Nûjîyane Şengal de dîya û vat, “Wexto ke ma wareyê Şengalî de xebitîyayêne mi reya bîne hevala Nûjîyane dîye. Serra 2015‘î de şibî Şengal. Nûjîyane cara nêeşkaye komkiştişê Şengalî qebûl bikera. Vera hêzanê ke Şengal de komkiştiş kerdo zaf bihêrs bîye. Hêrsê aye kerd ke verê xo bido Şengalî. Seba rastîya gemarîya ke Şengal de ameya kerdene eşkera bikera timî xebitîyayêne û cehd kerdêne ke seba şarê Şengalî çîyê bikero. Nûjîyane zaf girêdayîye azadîye bîye. Nê girêdayîşê a kerd cimatkîye û erdê xo rê kerd nêzdî. Semedê nê taybetmendîyanê xo hem hetê şerwanan ra hem hetê şarî ra zaf ameye heskerdene.

Şewe û roje xebitîye

Nûjîyan Erhane mîyanê şert û mercanê tewr giranan de, mîyanê şero derg de rojnamegerîya şerî kerde, cehd kerd ke serebûtê ke qewemîyê hetê cimatkî û eskerîye ra bi şeklêko hîra bida zanayene û waştêne ke bi rayîrê qelema xo heyfê cinîyan ê Şengalî  bigêra û  no xebat zî masa ser o nêkerdêne.  Nuqtayanê tewr tehlûkeyinan ê şerî de şerwanê azadîye teqîp kerdêne û rastîyê Şengalî game bi game, roje bi roje rayapêroyî rê dayêne zanayene. Şengal de seba eşkerakerdişê rastîyan bêvinetiş şewe û roje xebitîye.”

Kedkarêka duruste bîye

Xwînda bale ante serê nêbîyayîşê îmkan û zehmetîyanê ke ê pîya xebitîyeyê û vat, “Hem germ hem zî serdê Şengalî zaf ziwa yo.  Zimistanî serdê Şengalî zaf giran o, hamnan zî germ o.  Hema hema Şengal de teyna hamnan û zimistan esto. Wextê zimistanî bi. Hewa zaf serd bi. Hevala Nûjîne wextêk cayo ke naylonî ra amade kerdibi de mendêne. Rixmê heme bêîmkanî û zehmetîyan Nûjîne zaf girêdayîye azadîye bîye û wina ciwîyayêne. Bê vinetiş xebitîyayêne. Merdimêka şene bîye, zaf rindeke bîye. Kedkarêka duruste bîye û zaf girêdayîye amancanê xo bîye. A do timî ma rê biba nimûnêk.”

Bi zanayîş kerde hedef

Rojnamegere Sara Xwînda da zanayene ke hêrişê Nûjîne Erhane bi zanayîş ame kerdene û vat, “Kedkarêka çapemenîya azade bîye ke rastîya PDK'yî ya demê komkiştişê 3'ê Tebaxe eşkera kerde. Zîhnîyeto ke ney qet qebûl nêkeno, timî cinîyî kerdî hedef û hêrişê ci kerd. Hemkarîya AKP û PDK'î 3'ê Adare de Xanesor de komkiştiş kerd. Nê komkiştişî zî rojnamegerî, bi taybetî rojnamegerê cinîyî bîyî hedef. Sûîqestê vera Nûjîne normal nêbi, bi zanayîş a kerde hedef û bi nê hawayî komkiştiş kerd. Zîhnîyetê çeteyî, Nûjîn Erhan a ke rastîyan kena eşkera rastarast kerde hedef.”

Hêrsê ma girdêr kerd

Xwînda da zanayene, şehîdbîyayîşê Nûjîn Erhana hêrsê înan girdêr kerd û bado zî hûmara rojnamegeranê cinîyan ê şerî zêdetir bîya. Xwînda vat, “Ma do caran şehîdbîyayîşê hevala Nûjîyane xo vîr a nêkerê.  Her ca de do Nûjîyanê neweyî biresê û rastîyan bivejê meydan. Seba eşkerakerdişê rastîyan ma do timî têkoşîn bikerê.”