Îran û Rojhelatê Kurdîstanî de çalakîyê vera qetilkerdişê Jîna Emînî dewam kenê. Her hetê dinya ra cinîyî pê çalakîyanê cîya-cîyayan paştî danê xoverdayîşê cinîyanê Îran û Rojhelatê Kurdîstanî. Îstanbul de zî cinîyî serê Sersefîrîya Îranî de kom benê û rejîmê malayan ê Îranî şermezar kenê.

Nuştoxa îranije Sepîdehe Darvîshîya ke vera qetilkerdişê Jîna Emînî serkêşîya çalakîyanê Tirkîya kena 5 serrî verê koçê Tirkîya kerdo. Sepîdehe Darvîshî ANFyî rê qisey kerd û qala têkoşînê cinîyanê Îranî kerde.

Sepîdehe Darvîshî bale ante ser ke dewleta Îranî dişmena cinîyan a û vat: ''Ez bextîyarij a, nuştox û xirîstîyan a. Çend serrî verî îstîxbaratê Sîpahîyî mi ra waşt ke ez şora dêrî û înan rê ajanîye bikera. Tedaya şerîatî ra çend kesan dêrî de dînê xo vurnayêne. Îran de qedexe yo ke merdimî binê xirîstîyan, êyê ke dînê xo vurnenê yenê dardekerdene. Îstîxbarat mi ra waşt ke ez nameyê kesanê ke dînê xo vurnenê înan rê vaja. Seba ke mi qebul nêkerd destbend bîya, mi îşkence dî û ez pê tecawuzî ameya tehdîtkerdene. Ez neçare menda ke welatê xo ra birema.''

Sepîdehe Darvîshî rêçê îşkenceyî mojnayî û pare kerd ke a hema zî nêeşkena qeleme tepişa. Sepîdehe Darvîshî da zanayene ke seba ke înternet birîyayo a nêeşkena keyeyê xo ra agahîyan bigêra.

Sepîdehe Darvîshî îfade kerd ke dima ke Jîna Emînî ameye qetilkerdene, hînî tehamulê şaranê Îranî nêmendo û ê wazenê bi azadî biciwîyê. Sepîdehe Darvîshî vat: ''Ma hînî wazenê welatêkê azadî de biciwîyê. Tek waştişê ma no yo û ma do bi têkoşînî ney bikerê.''