Koorînasyonê PAJKî bi eşkerayîyêke Komployê 9ê Teşrîna Verêne ya 1998î şermezar kerd. Eşkerayîye wina ya:

''Ma hê dekewenê serra 27ine ya Komployê vera Rayber Apoyî. Ma hêzanê komplogeran ancî bi nefret û hêrsê şorişgêrî şermezar kenê. Ma şehîdanê 'Şima nêeşkenê tîja ma tarî bikerê' bi minetî yad kenê, verê vîrameyîşê înan de sereyê xo anê war û soz danê ke komployî bin bivisnê.

Komployo ke mîmarê ci Amerîka, Îngilîstan û Îsraîl ê, xeylêk welatê Ewropa û hêzê bînî zî tewrê ci bîyî. No zî mojneno ke armancê komployî çend pîl bîyo. Şexsê Rayber Apoyî de bi komployî teyna kurdî yan zî têgêrayîşê azadîye ney azadîya cinîyan û ameyoxê Rojhelatê Mîyanênî zî ameyî hedefkerdene. Seba dîzaynkerdişê Rojhelatê Mîyanênî hêverî înan verê xo da çinkerdişê Rayber Apoyî. 

Dewleta tirke ya faşîste çarçewa nê şerê qirkerdişî de Başûrê Kurdîstanî de baregehanê xo zêdînena, Sûrîye de israrê îşxalî kena û têkilîya nê kerdişan ê bi qirkerdişê Îsraîlî yê vera Filîstînî est o. NATOyî destûr dana qirkerdişanê dewleta tirke û Îsraîlî. Şero ke merkezê ci Kurdîstan o û vilayê pêro rojhelatê Mîyanênî beno newe ra dîzaynê sîstemê kapîtalîstî armanc keno. Coka komplo pêro hêzanê demokrasîyî û azadîye yê dinya zî eleqedar keno. Coka azadîya Rayber Apoyî çareserîya meseleya kurdan û azadîya şaranê Rojhelatê Mîyanênî ya. Na azadîye do peynîya îxanetê PDKyî bîyara, verê çareserîya konfederale bîyara û zemînê çeteyanê sey DAÎŞ, El Nûsra, Hîzbullahî ûsn. bîyara.

Hemleya 'Rayber Apoyî rê Azadîye, Meseleya Kurdan rê Çareserîye' têkoşînê şaran ê vera hêzanê kapîtalîstan o. Bêguman tewr zaf cinîyî raştîya komployî fam kenê. Coka cinîyî hemleya 'Jin Jiyan Azadî Ber Bi Şoreşa Jine we' anê ca. Têkoşînê vera komployî israrê azadîya cinîyan o. Cinîyî bi na hişmendîye do her ca de têkoşînê xo bikerê ala û komployî bin bivisnê.

27 serran o Îmrali de şarê kurdî û Tirkîya binê esaretî de yê û şer yeno xorinkerdene. Eke her kes seba azadîya Rayber Apoyî têkoşîn bikero demokrasî, azadî û haştîye do bêrê û berê demokrasîyî abibo.

Ma serra 27ine ya komployî de Konseya Ewropaya ke bi bira xo bîya hemkara dewleta tirke şermezar kenê. Ma her keso ke vera Komployê 9ê Teşrîna Verêne vejîyayo meydanan selam kenê. Ma venga her kesî dane ke heta ke Hemle netîce bigêro çalakîyan rê dewam biko û tewrê mîtîngê Amedî yê 13ê teşrîna verêne bibo.''