Peynîya serra 2012î bîye… Hemleya operasyonê şorişgêrî ya gerîlayanê HPG û YJA-STARî xeylî wareyanê Kurdistanî de vila bîbî, artêşa Tirkî arazî de felç bîbî. Dewleta Tirkî ya ke hemverê têgêrayîşê azadîya Kurdan de kewtebî tengî mîyan girawa Îmraliyî de seba pêvînayîşanê muzakereyan ê Rayberê Şarê Kurdî Abdullah Ocalanî hadreyîya xo kerdêne.

DAMA KE SERRA 2012 DE AMÎ RONAYENE

Erdoganî hetêk ra hadreyîyê pêvînayîşan kerdêne, hetêna ra zî Êlula 2012î de vatêne ke çira Almanya û Fransa verdanê serkêşê PKKyî bi rehetî gêrenê û înan îadeyê Tirkîya nêkenê. Dima ra roja 1ê Teşrîna verêne de dadgerê tehqîqatî yo Frans Thierry Fragnoli Sefaretê Enqereyî yê Fransa rê mesajêk şirawit û tede qalê xizmetê xo yê hemverê PKKyî kerdî û vat “hemverê vatişanê Erdoganî de ez nêeşkena hêrsê xo aşt bikerî.” Tenya Fragnoli ra veng vejîyabi. 

6 rojî dimayê nê mesajê Fragnoli ra 6ê Teşrîna verêne 2012 de kafeyêkê Montparnesse yê Parîsî de endamê Konseya Rayberdişî ya KNKyî Adem Uzun ame destbendkerdene. Na damêk bîye. Îxbar amebi kerdene ke qaşo Adem Uzunî do bi nameyê PKKyî fuzeyî biherînayêne. Dimayê 10 mengan ê tepiştişî ra tehqîqat bênetîce mend û Adem Uzun 9ê Tebaxe 2013 de zîndan ra vejîya. Adem Uzun heman wextî de bi nameyê sîyasetê Kurdan tewrê pêvînayîşanê Osloyî bibi.

QIRKERDIŞO KE DESTPÊKÊ PROSESÊ PÊVÎNAYÎŞAN DE VIRAZÎYA

Ver bi peynîya 2012î dewlete Îmrali de pêvînayîşan viraştêne. Rayberê Şarê Kurdî Abdullah Ocalanî hetêk ra heyetê dewlete dir hetêna ra zî heyetê HDP û KCDyî dir pêvînayîşî domnayêne. 3ê Çile de reya ewilêne heyetêko sivîl şi Îmrali.

Nê pêvînayîşî ra tena 6 rojî dima 9ê Çile de Parîs de hêrişêko gonin virazîya. Awankerdoxanê PKKyî ra Sakîne Cansize, temsîlkara KNKyî ya Parîsî Fîdan Dogane û endama têgêrayîşê ciwanîye Leyla Şaylemeze bi guleyanê ke nîyabî sereyê înan ra ameyî qetilkerdene.Qirkerdişî ra dima Rayberê Şarê Kurdî Abdullah Ocalanî bi vatişanê sertan verê xo dabi heyetê dewlete û MÎTî û vatibi “ganî no qirkerdiş bêro zelalkerdene.”

Rayberê Şarê Kurdî Abdullah Ocalanî qirkerdiş sey Komploya mîyanneteweyîye ya 2. û qirkerdişê Dêrsimî ercnabi vatibi “mucadeleyê Sakîne mucadeleyê azadîya cinî yo.” Nê mabênî de selahîyetdaranê PKKyî bale antêne ke peyê qirkerdişî de Tayyîp Erdogan û MÎT esto û do hesabê nê qirkerdişî bêro persayene.

TETIGKÊŞ OMER GUNEY, OYO KE FERMAN DA ENQERE

Omer Guney 1982 de Sêwas Sarkişla de amebi dinya. Têkilîyêka ê ya bi têgêrayîşê Kurdan dir nêamîbî tesbîtkerdene û dormeyêkê miletperweranê Tirkan de bibi weyî. Ver bi peynîya 2011î reyêk de Almanya ra agêrabi Fransa û komela Villiers-le-Belî ya Kurdan de qeydê xo yê endamîye viraştibi. Îhtîyacîya komele bi kesêk ke rind Franskî zanayêne estbi û Guneyî no sey firsend şuxulna. Dima ra bi telefonanê destan çimeyanê Teşkîlatê Îstîxbaratî yê Tirkî reyde bişîfre pêvînayîşî kerdî. Omer Guney qirkerdişî ra 12 rojî dima 20ê Çile de ame tepiştene û erzîya zîndanê Fresnes ê Parîsî. Heme rêçê ke prosesê dewa de vejîyabî meydan îşaretê Enqereyî kerdêne.

Dadgera dosya Jeanne Duyé derheqê Omer Guneyî yê tetigkêşî de qerarê “bi hawayêkê ekîbî kerdişê kiştişî” da û îdîanameyê 28ê Nîsane yê 2014î de zî seba temînkerdişê madeyê teqayîşî û planê zîndanî ra remayîşî Guneyî rê 10 serî cezaya hepisî daye.  

TALÎMATÊ MÎTÎ YO BI ÎBAREYÊ NIMITEYÎ

Dima ra reyêk de zîndanî ra xebera mergê Omer Guneyî amî. Ame vatene ke Guney 17ê Kanûne 2016 de Parîs de nêweşxaneyêk de merdo. Bi mergê bigumanî yê Guneyi dewa bi fîîlî kewte. Peyê xo de xeylî persê bêcewabî verdayî. La no bi îdîanameyan zî tesbît bi ke têkilîya Guneyî servîsanê îstîxbaratî yê Tirkan dir virazîyaya.

Talîmatê MÎTî ke ser de îbareyê “nimite” estbi û îmzaya selahîyetdaranê MÎTî ra mudurê Şubeyî O. Yuret, serekê Daîreyî U. K. Ayik, hetkarê serekî S. Asal û serek H. Ozcanî estbî tede vajîyayêne ke “Çimeyêk ma yo ke fealîyetanê Sakîne Cansize ya bi kodê Sara ra hayîdar o û eşkeno derheqê adresê aye de ma hayîdar bikero esto. No Çime eşkeno aye bi operasyonêk bêtesîr verdo û do no bêro ercnayene. Na çarçiwa de yeno plankerdene ke Çimeyî rê teşebusêkê hemverê Sakîne Cansize ya bi kodê Sara de talîmatî bêrê dayene. Eke şima zî munasib bivînê.”

Dima ra qeydê vengî yî Omer Guneyî yê hîrê ajananê Tirkî dir vejîya. Dewa bi mergê Omer Guneyî amebî waştene ke bi fîîlî bêro qedînayene. La seba avûkatanê keyeyanê hîrê şorişgêran, şarê Kurdî û PKKyî dewa nêqedîyabî.

OPERASYONÊ QESASÎ YO ŞORIŞGÊR

Qirkerdişî ra 5 serrî dima îfadeyanê di îdarekaranê berzan ê MÎTî ke Tebaxê 2017î de hetê gerîlayan ra ameybî tepiştene de ancî vejîyabi werte ke peyê qirkerdişê Parîsî de Enqere esto. Serekê Daîreyê Fealîyetanê Perçekerdoxan ê Etnîkan ê Zereyê Welatî Erhan Pekçetînî roxonayîşanê Çile 2018î de nê hayîdarîyî dabî:

“Gama mi qeydê vengî yê ke kewtîbî înternet goşdarî kerdî mi vengê înan ra zana ke operasyon hetê serekê Daîreyê EBFyî Ugur Kaan, mudurê operasyonî yê ê daîreyî Oguz Yuret û memurê ê daîreyî Ayhan Oranî ra ameyo plankerdene û rayraberdene. Çunke mi vengê înan ra ê şinasnayî. Înan bi endamê xeberan ê bia nameyê Omer Guneyî Enqere de otelêk de qisey kerdo. Notê arzî ganî bêro şirawitene musteşarî rê. Heta ganî serekkomar zî tesdîq bikero. Çunke meseleyêko mîyanneteweyî yo. Dima ra ê hîrê kesan bi leze terfî kerd.”

Îdarekarê Çimeyanê Merdiman ê MÎTî ra Aydin Gunelo ke hetê HPGyî ra amebi tepiştene zî nameyê ke notê arzî de bî wina teyîd kerdîbî.

“Îmzaya ke sey O. Yuretî ya aîdê Oguz Yuretî ya. Oguz Yuret nika serekê daîreyê herêma Wanî yo. U.K. Ayik zî Ugur Kaan Ayik o. Nika serekê fealîyetanê taybetan o. S. Asal zî Sabahattîn Asal o. Nika hetkarê musteşarê Îstixbaratê Stratejîkî yo. Îmzayê ke notê arzî de ca girewtêne aîdê nînan bî.”   

HÊRSO KE AŞT NÊBENO Û CIGÊRAYÎŞÊ EDALETÎ

PKKyî bi operasyonê hemverê îstîxbaratî yê şorişgêrî û KCKyî zî 3ê Çile 2018 de bi eşkerayîyêk derheqê qirkerdişê Parîsî de rayapêroyîye hayîdar kerdî. Bi nê dokment û roxonayîşan kiştoxî vejîyayî werte la seba ke nê kesî vejîyê vernîya dadgerîye hewna averşîyayîşêko konkret nêvirazîyayo.

Qirkerdişî ra nata hêrsê şarê Kurdî qe aşt nêbi. Hetê têgêrayîşê azadîya Kurdan, şarê Kurdî û dostanê înan ra cigêrayîşê edaletî yê seba qirkerdişê Parîsî bi serran o domeno.

Cinîyê Kurdî yê ke pêrodayîşê Sakîne Cansize dewr girewto vatişê “Mucadeleyê Sakîne Cansize azadîya cinî ya” yê Rayberê Şarê Kurdî Abdullah Ocalanî vejênê rayîr, mucadeleyê azadîya her cayê dinya de kenê vila û cinîyan ê dinya rê benê nimûne.