25ê Teşrîna peyêne roja destpêkerdişê mucadeleyê hîrê wayan ê bi nameyê Patria, Minerva û Maria Mirabelan ê vera Cumhurîyetê Domînîkî ya. Mucadeleyê nê wayan ê vera hukmatê dîktatorî yê Rafael Leonidas Trujilloyî bîyo sembolê na roje.

17ê Kanûna 1999î de Yewîya Miletan 25ê Teşrîna peyêne sey Roja Paştîdayîş û Mucadaleyê Mîyanneteweyîye ya Vera Şidetê Serê Cinîyan îlan kerd.

Tirkîyaya ke her roj qewimîyayîşê şidetî esto cinîyî her serre 25ê Terşîna peyêne bi coşa pîle verwazî kenî. Cinîyanê rojnamegeran ke ANFyî rê qisey kerd ard ziwan ke ê 25ê Teşrîna peyêne de do bivejîyê kuçeyan.

Mûxabîra rojnameyê Evrenselî Eylem Nazliere vist vîrî ke huqûqê Tirkîya tim ceza dano cinîyan û camêrdî zî naye ra paştî gênî û va: ‘‘AKP cinîyan rê dişmenîye keno. Her roj tewr tay 3 cinîyî yenî qetilkerdene. Medyaya hemkare zî xeberanê qetilkerdişî seke ke cinîyan no heq kerdo wina dana û şidetê camêrdî meşrû kena. Ma sey rojnamegerî hem nasnameyê cinîye ra hem zî rojnamegerîye ra ancenî la ê se kenî wa bikerî ma mucadeleyê xo rê dewam  kenî. 25ê Teşrîna peyêne de ma cinî do pêro pîya seba cuyêka seypê, azad û demokratîke bivejîyê kuçeyan.‘‘

Mûxabîra Jîn Newsî Rojda Aydine zî ard ziwan ke tewr zêde cinîyê rojnamegerî  raştê şidetî yenî û wina domna: ‘‘Seba ke rojnamegerê cinîyî xeberanê tacîz tecawuzî ser o hîna zaf vindenî, camêrdê kerdoxî hêrişê ma kenî la ma cinîyî heta ewro nêvindertî û do mevindere. Ça û çi wext beno wa bibo ma do vengê cinîyan bidê eşnawitene.‘‘

Eda Narine ke hemverê şidetî de bêveng nêvindert û Dokuz8 Haberî ra îstîfa kerde vist vîrî ke Teşrîna peyêne de camêrdan 20 cinîyî qetil kerdî û va: ‘‘Ê ke vernîya şidetê serê cinîyan akenî, ma rojnamegerê cinîyî ganî vera înan de vinderê. Ma do seba ke vengê embazanê xo yê rojnamegeranê cinîyan rê bibê veng û seba vatişê ‘Ma yewna kes do kêm mebê‘ 25ê Teşrîna peyêne de Taksîm de yê.‘‘

Ekmek û Gul ra Elîf Ekîn Saltike zî ard ziwan ke emser Kurdîstan û Tirkîya de cinîyî şartanê zehmetan de kewnî 25ê Teşrîna peyêne û best pa: ‘‘Bi ameyîşê krîzî neçarîye zafêr bî û no zî şidetê serê cinîyan hîna zaf kerd. Bi neçarîye wazenê ke cinîyan bigêrê binê kontrolî. Ma do rixmê heme şidet û zextan bivejîyê meydanan û mucadele rê dewam bikerê.‘‘