Ozlem Soylera ke Zindanê Girewteyî yê Cinîyan ê Gebzeyî de 98 rojî yo ke grevê vêşanîye yê bêdem-bêagêrayîşî de ya mektûba xo de bale ante nînan ser: “Ma şinawenê ke her kes seba ma endîşe û qesawet keno. Helbet hetê manewîyî ra no moral û hêz dano ma, la eke tena cayê xo de ronişê û seba ma endîşe û qesawet bikerê no yeno a mana ke seke ma nêrê famkerdene. Qe nêbo proses hendî nê çîyî nêdareno we.”

Ozlem Soylere 1985 de Umranîye ya Stenbolî de amî dinya. Pîyê ci Erzirom ra û maya ci zî Trabzon ra ya, 2002 de tewrê Mucadeleyê azadîya Kurdistanî bîye. 2012 de Amed de amî tepiştene û ci rê 17 serrî û 10 mengî cezaya hepisî amî dayene. Soylera ke Zîndanê Girewteyî yê Cinîyan ê Gebzeyî de manena derheqê çira çalakîye de yê û bendewarîyanê xo de yew mektûbe nûşte. Mektûba Soylere ke roja 85’ine ya çalakîye de nûşte wina ya:

Hemverê ma de tecrîd yeno xorîkerdene

“Hewayo sîyasî yê teberî elektrîkê xo tewr zaf tîya dano hîskerdene. Hendî nêverdanê ke ma cumleyêkê aleladeyî zî tîya ra pare bikerê. Sey “bitehluke” yenê namekerdene û kenê babeta sûcî. Her çend sey tezat û xîlafî biaso zî rastî na ya ke ma hemverê tecrîdî de wayîrê tewirî yê la hemverê ma de zî tecrîd çende şino yeno xorîkerdene. Weş o, sey şexis îtîrazêkê ma nê rê çino. Îtîrazê ma tecrîdo ke şexsê ma de cimatî ser o yeno ferzkerdene, ê rê yo.

Heta ke ma binê tehdîdê metgî de ciwîyenê

Hetê ruhkîyî ra sey roja ewilêne ma wayîrê moral û qerardarîye yê, gane yê, bimoral ê û îdîaya mi hîna bîya xurte. Ferdê sey ma yê ke zerrî vista azadîye wayîrê fehm û îradeyê ke bizanê ça, çiqas û senî biciwîyê.  Ez nika zî ana ziwan; herinda ke ma her roje asta koletî de binê tehdîdê mergî de biciwîyê ma mergî rê meydan wanenê û bi hawayêkê manîdarî heme netîceyan rê amade yê.  Na dewayêka anorî ya. Anorê ma, xoverdayîşê ma yo ke seba şarî dîyeno do qetîyen bi ser bikewo.

Wayîrvejîyayîşêko hîna xurt

Ez sey hem Kurdêk û hem zî yewa Behrasîyayije seba ke mi prosesêkê wina destankî û tarîxkîyî de ca girewto şa ya. Şarî û şarê ma ganî na govenda serkewtişî de bi vengêkê hîna berzî wayîr ci rê vejîyê.  Sînayeyê ma, keyeyê ma, dostê ma, şarê Tirkîya û şarê Kurdî ra bendewarîya ma na ya. Denizî, Mahîrî, Kemalî û Sakîneyî ma rê bexçeyêkê şaran o winasî mîras verda. Ma nêverdê ke ruhê yewîye yê nê bexçeyî bibo ziwa. Wa ruhê serkêşanê ma şa bo, çîyo ke do wesîyetê înan bica bîyaro, no xoverdayîşo manîdar û derg o.

Ma do binkewtişê wijdanîyî biciwîyê

Ma ferqê ci de nêbê 21 serrî yo hemverê sîstemê tecrîdî yê Îmraliyî de merdimîya ma, wijdanê ma û sebrê ma yeno îmtîhankerdene.  Xora ma xeylî derbe girewt. Ganî na birîna cimatkîye tavilî bêro tedawîkerdene. Yan nê ma do heme seba çîyanê ke ma ewro nêkerdê aver de binkewtişê wijdanî biciwîyê.  E, umîd weşik o. Labelê umîd hendî bi tena sereyê xo nêeşkeno xeyalanê ma bica bîyaro. Umîd sey gilyazêre yo.  Eke ma wazenê bireso, vile bido û mêwe bigêro ganî ma awa ci bidê, kulbe bikerê û hewa bidê erdê ci. Rayîrê nê zî bêters, bi hawayêkê cesûrkîyî paştîdayîşê waştişanê grevkerdoxan ra ravêreno. 

Bes nêyo ke kes biendişê û biqesawet bo

Ma şinawenê ke her kes seba ma biendîşe û biqesawet o. Helbet hetê manewîyî ra no moral û hêz dano ma.  La ganî bêro zanayene ke eke tena cayê xo de ronişê û seba ma endîşe û qesawet bikerê no yeno a mana ke seke ma nêrê famkerdene. Qe nêbo proses hendî nê nêdareno we. Aya ke endîşe û qesawetê ci derheqê ameyoxî de berz bi embaze Leyla bîye. A zî ramot ke seba nê ganî çi bêro kerdene û tewirê xo ramot. Ganî çew biewnîro nê dîmenî ra û cewabêkê weşikî bido ci.

Weşîya ma pabesteya qewimîyayîşan a

Ewro ma roja 85. ya çalakîya xo de yê.  Ez serê halê ma yê weşîye de nêvinderta, nêard ziwan. Seba ke weşîya ma pabesteya qewimîyayîşan a mi bi zanayîş nêard ziwan.  Mîyanê umîd û xoverdayîşê welatêkê azadî de, sohbetanê azadan de bimanê...”