TJK-E komployo mîyanneteweyî yê 15ê Sibate yê vera Rayberê Şarê Kurdî Abdullah Ocalanî şermezar kerd û sere de cinîyan venga hêzanê demokrasîyî û azadîye, şar û dostanê kurdan da ke tewrê rayraşîyayîşê Strasbourgî bibê.
Eşkerayîya Têgêrayîşê Cinîyan ê Kurdan ê Ewropa (TJK-E) wina ya:
“Ma serrgêra 21. ya komployê mîyanneteweyî de yê ke 15ê sibata 1999î de ame kerdene û seba Kurdîstan û Rojhelatê Mîyanênî sey roja tarîye yeno pênaskerdene. Ma sere de dewleta tirke pêro viraştoxanê nê komployî bi hawayêkê hêrsî, nefretî şermezar kenê. Komployo mîyanneteweyî yê 15ê Sibate têna vera Rayber Apoyî ney vera şarê kurdî û cinîyanê kurdan û pêro merdimîye ame kerdene. Rayberê ma no kayê komployî eşkera kerd û Zîndanê Îmraliyî de xo der da. Ma sey cinîyanê kurdan îfade kenê ke ma do qerardarîya xo ya seba pûçkerişê nê komployî dewam kenê.
Bi na qerardarîye sey her serre ma venga her kesî danê ke 15ê sibata 2020î roja şemeyî de Strasbourgî de bi şîara ''Seba Rayber Apoyî azadîye, seba Kurdîstanî statu'' tewrê rayraşîyayîşê protestoyî yê vera komployê mîyanneteweyî yê 15ê Sibate bibê. Nê esasî ser o ma venga pêro cinîyan, şara û dostan, hêzanê demokrasîyî û azadîye danê ke 15ê Sibate de tewrê rayraşîyayîşê Strasbourgî bibê. Ma bi hawayêkê xurtî dibare kenê ke ma têkoşînê azadîye berz bikerê ke no têkoşîn komplogeranê 15ê Sibate qehr keno.''
