Vervatoxa Çapemenîya Hêzanê Sûrîyeya Demokratîke  (QSD) Ferhat Samîyî Awbendê Tişrînî ra da zanayene ke vatişê Wezîrîya Pawitişê Tirkî yê ''Awbendê Tişrînî binê kontrolê SMOyî de yo'' raşt nîyo.

Ferhat Samîyî ke Awbendê Tişrînî de qisey kerd derheqê rewşa şerî de zî erjnayîşî kerdî. Ferhat Samî nê vatî:

''Ewro 26ê kanûna 2024î, saete 17:20. Ma nika Awbendê Tişrînî de yê. Seke yeno zanayene Wezîrîya Pawitişî ya Tirkî îdîa kerd ke Awbendê Tişrînî binê kontrolê çeteyan de yo. La ma tîya de yê û embazê ma bi estbîyayîşê xo reyna mojna ra ke nê vatişî raşt nîyê.

Dewleta tirke ya îşxalkere ya ke xeylê wext o vera şarê herêmê hêrişê qirkerdişî kena, ewro zî vera awbendî û dewanê dormeyê ci  bi hêrişan qirkerdişanê xo domnena. Şervanê QSDyî û pêro pabesteyê ci 20 rojî yo tîya têkoşînê girdî kenê. Şervanê QSD-YPG-YPJyî vera hêrişanê îşxalî bîyî bingehê serkewtişanê şarê ma. Seke yeno vînayene awbend bi temamî destê hêzanê QSDyî de yo. Pêkewtişî vakurê awbendî de dormeyê dewa Ebu Qelqelî de qewimîyenê.

Dewleta tirke kena ke bi şerê taybetî moral bidê çeteyan ke xoverdayîşê 20 rojan de nizdê 450 vîndîbîyayeyê ci, bi desan birîndarê ci est ê û xeylê tanq, top û zî tede xeylê wesayîtê ci ameyî îmhakerdene. Ma tîya de yê û ma do tîya bê. Embazê ma tîya xover danê, derbanê giranan danê îşxalkeran ro û semedê pawitişê şar û herêma xo ganê xo danê. Embazê ma tîya bedelanê girdan danê. Ganî heme hêzê ma yê herême nê refan de cayê xo bigîrê.

Roje roja anorî ya, no şer têna şerê yew awbendî û dewe nîyo, no şerê estbîyayîşî yo. Ya ma est benê ya zî ma est benê! Nê semedî ra ganî her kes bi moralê pîlî bêro tîya têwrê xoverdayîşî bibo. No xoverdayîş do ameyoxê ma roşn bikero û destê ma xurt bikero. Eke no xoverdayîş nêbo milê ma beno çewt û Sûrîye de çîkê ma nêmaneno. No xoverdayîş do estbîyayîşê ma îspat bikero û ameyoxê Sûrîye de rewşa ma bewlî bikero. Xoverdayîşê ma do bi serkewtişî bêro tackerdene.''