Xeylêk şaristananê Ewropa de qetilkerdişê Jîna Emînî ame protestokerdene û xoverdayîşê cinîyan ê kurdan û farsan ame selamkerdene.

Şaristananê Osnabruckî û Munsterî yê Almanya de serkêşîya Komunê Şehîde Şîlane û Komunê Cinîyan  de cinîya bi çalakîyêke xoverdayîşê cinîyanê Rojhelatê Kurdîstanî û Îranî selam kerd. Cinîyî dîyar kerd ke ê wayîrê nê xoverdayîşî vejîyenê.

Şaristananê Frankfurtî yê Almanya de zî serkêşîya Meclîsê Cinîyan ê Amara de cinîyan dewleta Îranî protesto kerde. Cinîyan çalakîye de sloganê sey 'Cinîye, Cuye, Azadîye' û 'Ma pêro Jîna yê' vatî. Cinîyan dima çalakîya rayraşîyayîşî zî kerde.

Şaristanê Bielî yê Swîsre de qetilkerdişê Jîna Emînî û leşkera armenî Anushe Abetyan bi çalakîyêke hetê cinîyan ra ameyî şermezarkerdene.  Cinîyê kurdî vengdayîşê Komunê Cinîyan ê Garzanî ser o tewr vernî de tewrê çalakîye bîyî. Cinîyan bi hawayêkê temsîlî çalakîye de laçikê xo vetî û eştî war.

Çalakîye de dîya zanayene ke ewro serkêşîya YJK-Syî de şaristanê Aarauyî de û peynîya hewteyî de zî pêro şaristanan de çalakîyî do bêrê kerdene û venga pêro cinîyan dîya ke tewrê çalakîyan bibê.