Fermandarîya Pêroyîye ya YPJyî bi wesîleya Roja Mucadeleyê Şidetê Hemverê Cinî ya Mîyanneteweyîye eşkerayîyêka nûştekîye daye.

Fermandarîye vat: “Ma do xoverdayîşê wayanê Mirabelan û heme cinîyanê şorişgêran bi mucadeleyê xo xurt bikerê û ma do ercê ke ameyê afernayene heta peynî bipawê.”

Eşkerayîye de ame vatene ke xoverdayîşê wayanê Mirabelan heme cinîyanê dinya rê beno serçimeyê îlhamî û nê ameyî vatene:

“Hendî tenya 25ê Teşrîna peyêne nê, her game û her wareyê cuye bi xoverdayîş yeno neqişkerdene. No xoverdayîş derbeyan dano hem zihnîyetê camêrdî yê serdestî ro û hem zî sîstemê kapîtalîstî ro. Cinî çende bi pawtiş û xoverdayîşê xo wazena îradeyê xo vejo meydan, sîstemo serdest zî hende bi barbarî hêriş keno. Na yewe ra sere de yê cinîyan ê kurdan heme mucadeleyê cinîyan ê dinya tarîxkî yo û manîdar o. No mucadele xo rê afernayîşê cimatêkê exlaqî, polîtîk û azadî keno amac.     

Rojava û Vakurê Sûrîye de nê rojan hêrişê giranî estê. Bi nê hêrişan cinîyî yenê hedefgirewtene. Çeteyê DAÎŞî û dewleta tirkî dişmenê cinî yê tewr pîl ê. Hemverê nê hêrişan de zî cinîyî xo ver danê û serre nênanê ro.

Ma sey YPJyî na roja manîdare rê wayîr vejênê. Ma do bi mucadeleyê xo xoverdayîşê înan hîna xurt bikerê. Ancî veng danê heme cinîyan dinya ke her roja 25ê Teşrîna peyêne bikerê roja xoverdayîşî û mucadeleyî.”