Seroka Koma Partîya Çep a Şaredarîya Helsingborgî İnger Mattiasson Sardinene û Endamê Meclîsê Şaredarîye ya Partîya Çep a Şaredarîya Norrkopingî Nicklas Lundstromî hesabanê xo yê medyaya komelkî ser o beyanat da, vera tayînkerdişê qeyûman vinetî û dîyar kerd ke ê şaredaranê Wan, Mêrdîn û Amedî reyde yê.

Sardinene ard vîrî ke tadayîyeka girane Kurdanê Tirkîya rê yena kerdene. 19 Tebaxe de hemşaredarê ke bi metodanê demokratîkan ameybî weçînitene wezîfeyanê xo ra ameyî dûrî fîştene, nêzdîyê 400 HDP‘yî ameyî girewtene û wina vat: "Na yewe nêna qebulkerdene" Sardinene dîyar kerd ke ganî dewletê rojawayî hîna zaf zext bi Erdogan û hukumetê ey bikerê. Sardinene hukmetê Swêdî ra zî waşt ke vera çinkerdişê demokrasî û seba heqanê şarê Kurdan bikewo mîyanê tewgêrî.

Êndî Demokrasî Çîn o

Lundstromî zî îfade kerd ke rejîmê Erdoganî vera Kurdan dest bi şerî kerdo, şaristanê Kurdan rijnayê, bi hezaran Kurdî girewte û bi des hezaran zî karî ra vetê. Nicklas Lundstromî vat: "Erdogan demokrasîyê welatê xo meydan ra darneno we. Partîya Çepe HDP ya ke giranîya xo Kurdan ra yena pê Tirkîya de partîya tewr pîl a hîrêyin a. Na partîye Kurdistan de gelek şaredarî girewtî la Edoganî nêeşka tehamulê na yewe bikero. Hemşaredarê hîrê şaristanan bi zor wezîfe ra dûrî fîştî. Merdimê ke girêdayîyê ey ê tayîn kerdî. Welateko nînan keno êdî demokratîk nîyo."