Şaristananê Frankfurt, Heldesheim û Stuttgartî yê Almanya de hêrişê dewleta tirke ameyî protestokerdene.

Hêrişê dewleta tirke ya îşxalkere û destsernayîşê şaredarîyanê HDPyî pê nawnayîşêk ameyî protestokerdene. Qiseykerdişan de ame vatene ke faşîzm her ca de bi heman hawayî hêriş keno.

Şaristanê Hildesheimî yê Almanya de rijnayîşê goranê gerîlayan, hêrişê vera Zînî Wertê yê Başûrê Kurdîstanî, şîdetê vera cinîyan û HDPyî ameyî protestokerdene. Çalakîye de ke rayberîya Merkezê Komelê Kurdan ê Demokratîkî û Komunê Cinîyan ê Meryeme de ameye kerdene, pankarta bi nuşteyê 'Şerê Tirkîya û milîsanê înan bêro vindartene' ameye akerdene û alayê TEV-DEM û TJK-E ameyî berzkerdene. Çalakîye qiseykerdişan ra dima qedîyaye.

Aktîvîstanê Têgêrayîşê Ciwanan ê Şorişgêran (TCŞ) şaristanê Stuttgartî yê Almanya de Meclîsê Cinîyan reyde hêrişê dewleta tirke protesto kerdî. Qiseykerdişan de ame vatene ke destsernayîşê şaredarîyan yeno manaya xespkerdişê îradeyê şarî. Çalakîye de posterê Rayberê Şarê Kurdî Abdullah Ocalanî û alayê Kurdîstanî ameyî berzkerdene.