Vizêr reyna kurdîstanijî û dostê înan semedê protestokerdişê dewleta tirke ya îşxalkere kuçeyan de bî. Çalakîyan de hêrişê dewleta tirke, hemkarîya PDKyî û bêvengîya Ewropa û hêrişê qirkerdişî yê vera Kampa Multecîyan a Mexmûrî ameyî şermezarkerdene.

Bajarê Baselî yê Swîsre de hêrişê îşxalî û qirkerdişê ke dewleta tirke vera kurdan kena bi çalakîyêke ameyî şermezarkerdene û semedê pîlkerdişê têkoşînî ame vengdayene.

Paytextê Fransa Paris de zî bi çalakîyêke hêrişê îşxalî yê dewleta tirke û paştgêrê ci ameyî şermezarkerdene û paştî dîyayî xoverdayîşê gerîlayan.

Bajarê Marsilya yê Fransa de ciwananê kurdan semedê paştdayîşê xoverdayîşê gerîlayan çalakîyêke organîze kerde. Ciwanan vera hêriş û xayînîye hersê xo ard ziwan û mesajê xurtkerdişê têkoşînî dayî.

Bajaranê Stuttgart û Freiburgî yê Almanya de zî kurdîstanijan û dostanê înan vera tecrîd û hêrişê îşxalî çalakîye kerde. Çalakîyan de ame vatene ke ê do vera xayînîya PDKyî bêveng memanê û her cayî biaçarnê cayê têkoşînî. Çalakîyan de bi sloganan azadîya Abdullah Ocalanî ameye waştene û xoverdayîşê gerîlayan ame selamkerdene.

Bajarê Limassolî yê Qibris de zî kurdîstanijan hêrişê îşxalî yê dewleta tirke şermezar kerdî û wayîrê xoverdayîşê gerîlayan vejîyayî.