Kampa multecîyan de tecrîdê vîrusî

Magdeburgê Almanya de kampêka multecîyan de ke tede 800 kesî manenê, 2 multecîyan de vîrusê Korona ame tesbîtkerdene. Herinda ke 2 multecîyî bigêrîyê binê karantîna erşawîyayî kampe.

Şaristanê Magdeburgî yê eyaletê Saksonya Anhaltera yê Almanya de kampêka multecîyan de 2 multecîyan de vîrusê Korona ame tesbîtkerdene. Herinda de 2 multecîyî bigêrîyê binê karantîna erşawîyayî nêweşxaneyê kampe. Kampe de nêzdî 800 kesî manenê û werdgeh, robar û tuwaletî bi hawayêkê hemparî şuxulîyenê. Îdareyê kampe zî pêro kampe girewte binê karantîna.

Multecîyanê kampe pare kerd ke ê nêwazenê nêweşanê Korona reyde bimanê la îdareyê kampe dormeyê kampe girewt. Multecîyan zî vera îdareyê kampe nêrazîbîyayîşê xo mojna û dest pê grevê vêşanîye kerd. Polîsan dormeyê kampe girewt û hêrişê multecîyan kerd. Multecîyan hetkarîya Masaya Krîzî ya Berlinî waşte.

Nameyê koordînasyonê Masaya Krîzî ser o Mehtape Erol û wekîlê Die Linke Hakan Taşî îdareyê kampe reyde pêvînayîş kerd. Taşî vat: ''Seba çareserkerdişê mesele ma xîret kenê. Ma Wezaretê Karanê Zereyî rê mektubêk erşawit.''

Multecîyêkê  kampe zî vat: ''Kampe de testê di kesan pozîtîf vejîya. Nê kesî erşawîyayî kampe. Ma kampe de 800 kes ê û qerqilîyenê. Seba ke dekewtiş û vejîyayîşê kampe qedexe yo ma nêeşkenê bi hawayêkê qimî werd bigêrê. Ganî nêweşî bêrê weşkerdene. Eke wina dewam bikero ma pêro do nêweş bibê.''