KCDK-E'yî ard vîrî ke heta nika nêzdîyê 200 merdiman cuya xo vîndî kerda û vat, “Cayê ke laser werişto rîskê serdeşîyayîşê awbendan û bobelatanê neweyan esto.  Seba naye zî beno ke na bobelate xo reyde bena sebebê xeylî rijiyayîşan û merdişan. Xeylî cayan de seba ke rayîrî bîyê xirabinî, resayîşî de zehmetîyê girdî vejîyayê werte.

Rejîmê Îranî teyna serê şarî de zext nêkeno, herêma Rojakewtene teyna verdano û wazenê ke ceza bido ci. Xora bi polîtîkayanê cîyaker û kolonyalîstan bingeyê na bobelate viraşto. Nê polîtîkayî, wayîrnêvejîyayîşê rejîmê Îranî, şarê herême vera bobelate de bêçare verdayo. Rixmê derbazbîyayîşê çend rojan rejîmê Îranî hetkarîye nêda kesanê ke zerar dîyo û seke no qederêk bo xo berpirsîyarîye ra dûrî geno.

Ma KCDK-E seba ke ma dejê şarê xo yê Rojakewtena Kurdistanî, seba dejê heme herêma ke rîyê bobelate ra merdiş û zerarê madî dîyê, seba ke vera merdişan bigê û zerarê madî sivik bikerê ganî ma bikewê mîyanê têgêrayîşî.

Seba naye zî ma hetkarîya şarê xo yê Rojakewtene bikerê, ganî heme meclîsê ma, pabesteyê ma seferber bibê û tewrê kampanyaya Heyva Sor a seba Rojakewtene bibê.

Ma KCDK-E ganî ma dejê can û zeraro ke rîyê bobelate ra eyaletanê Îranî de qewemîyayo pare bikerê. Na babete de ganî ma sazgehanê bêvengan ê mîyanneteweyîyan zî bikerê mîyanê têgêrayîşî û seba naye zî ganî ma xebatan bikerê.”