17ê adare de dewleta tirke ya îşxalkere bi droneyanê çekdaran dewa Berxbotanî ya Kobanê de 7ê ci domanî 9 kesî qetil kerdibî. Qirkerdişê Berxbotanî Ewropa de ame protestokerdene.

Şaristanê Hamburgî yê Almanya de girseyî sloganê sey ‘Kobanê nêkewta, do nêkewa’ vatî û eşkerayîyêke daye. Çalakîkeran eşkerayîye ra dima deqayêk rêz girewt.

Şaristanê Cenevre yê Swîsre de çalakîye de ame parekerdene ke hêriş û qirkerdişê dewleta tirke yê vera Rojawanî dewam kenê û venga hêzanê mîyanneteweyîyan dîya ke verê nê hêrişan bigêrê.

Şaristanê Saarbruckenî yê Almanya de zî çalakîyêke ameye kerdene. Çalakîye de bale ameye antene ser ke dewleta tirke hetêkî ra qalê haştîye kena la hetê bînî ra hêrişê Rojawanî kena. Çalakîye bi sloganan qedîyaye.

Şaristanê Darmstadtî yê Almanya de zî qirkerdiş ame protestokerdene û ame vengdayîne ke wa vera qirkerdişê her kes vengê zo berz bikero.

Paytextê Fransa Paris de zî dezgehanê kurdan  bi eşkerayîyêke veng da dezgehanê eleqedaran ê Ewropa ke wa vera qirkerdişê dewleta tirke yê vera Kobanê ke sûcê şerî yo, cade têbigêrê.

Şaristanê Lozanî yê Swîsre de serkêşîya Merkezê Komelê Kurdan ê Demokratîkî û Meclîsê Cinîyan ê Lozanî de vengdayîşê KCDK-E ser o çalakîyêke ameye kerdene. Çalakîye de hêrişê dewleta tirke ameyî protestokerdene.

Şaristanê Frankfurtî yê Almanya de serkêşîya Merkezê Komelê Demokratîkî yê Kurdan de çalkakîyêke ameye kerdene. Çalakîye de venga rayaumûmîya mîyanneteweyîye dîya ke verê hêriş û qirkerdişanê dewleta tirke de bêveng nêmana.