Şaredarîya Rende ya Îtalya hemwelatîya rûmetî dabi Rayberê Şarê Kurdî Abdullah Ocalanî. Sersefîrê Roma yê Tirkîya Murat Salîm Esenlîyî mektubêke erşawite Mannayî û kerd ke Mannayî ser o teda rono. Mektube de Esenlîyî Mana pê 'paştdayîşê terorîzmî' sûcdar kerd.

Mannayî hesabê xo yê facebookî ser o mektuba Esenlîyî û cewabê xo vila kerd.

Mannayî vilakerdişê xo de wina vatbi: ''Seba ke ma hemwelatîya rûmetî daye birêz Abdullah Ocalanî ma ne paştî daye terorîzmî ne zî ci meşrû kerd. Rayberê Şarê Kurdî lîsteya terorî ya qet yew dewlete de ca nêgêno. O 22 serrî yo binê tecrîdî de keno ke şarê xo bipawo.

Ma musayeyê ci yê ke krîteranê têdûştî û cîyatîyan ser o nîqaşan bikerê. Rende seba pawitişê heqanê merdiman û têdûştîya mabênê şaran do hetê bindestan de ca bigêra!''

Şaredarîya Rende destpêkê nîsan de hemwelatîya rûmetî dabi Birêz Abdullah Ocalanî.  Mannayî o çax pare kerdbi ke Rayberê Şarê Kurdî Abdullah Ocalan seba çareserîya demokratîke ya meseleya kurdan têgêreno. Mannayî vatbi: ''Konfederalîzmo demokratîko ke hetê Abdullah Ocalanî ra ame pêşkêşkerdene modelê komelêkê alternatîfî yo.''

Verî zî şaredarîyanê Napoli, Palagonia, Reggio Emilia, Riace, Martano, Pinerolo, Castel de Giudice, Castel Bottaccio, Berceto, Cinquefrondi û Fossaltoyî hemwelatîya rûmetî dabi Abdullah Ocalanî.