Kongreya Yewîya Sendîkayan a Skoçya (STUC) Wezîrê Karanê Teberî David Lammyî rê mektubêke şawite û vat: ''Seba Abdullah Ocalanî têbigêrê.'' STUCî ra Dave Moxham vat ke Abdullah Ocalan şerwanêkê azadîye yo.
Kongreya Yewîya Sendîkayan a Skoçya (STUC) a ke 550 hezar endamê ci est ê, bi wesîleya serrgêra Hemleya Abdullah Ocalanî rê Azadîye, Meseleya Kurdan rê Çareserîye' Wezîrê Karanê Teberî David Lammyî rê mektubêke şawite.
Hetkara Sekreterîya Pêroyî ya STUCî Dave Moxham derheqê babete de verê bînaya dezgehî de eşkerayîyêke daye.
Dave Moxham dîyar kerd ke Abdullah Ocalan 25 serrî yo zîndan de, binê tecrîdî de yo û vat: ''Abdullah Ocalan şerwanêkê azadîye yo. Dewaya şarê kurdî sba ma meseleyêka girîng a. Coka ma venga hukmatê Qralîyetê Brîtanya da ke seba azadîya Ocalanî tedaya Tirkîya bikero.''
Sekreterîya Pêroyî ya STUCî ra Roze Foyera ke mektube îmza kerda mektube de nê çîyî vatî: ''Meseleya kurdan seba Tirkîya û herême, seba haştî, demokrasî û heqanê merdiman meseleyêka girîng a. Azadîya Ocalanî seba çareserîye do biba gama yewine. Tecrîdê vera Ocalanî îşkence yo. Ma 23yê temmuza 2023yî de zî verê Parlamentoyê Ewropa de eşkerayîyêke daye û bale ante na mesele ser.''
Mektube de nê çîyî ameyî waştene:
''-Ma rica kenê ke şima nameyê hukmatê Qralîyetê Brîtanya ser o venga Tirkîya bikerê ke wa Ocalan keye û avûkatanê xo de pêvînayîş bikero.
-Şima Konseya Ewropa û Komîteya VErgirewtişê Îşkenceyî ra biwazê ke Îmraliyî zîyaret bikerê û agahîyan bidê, seba wedarîyayîşê tecrîdî têbigêrê.
-Ma rica kenê ke şima bi rayîrê ma derheqê rewşa Ocalanî û nîqaşanê serê meseleya kurdan de komelê kurdan ê Skoçya agahdar bikerê.''
