Heyetê HDP’yî yê bi serekîya hemsereka HDP’yî Pervîn Bûldane di rojî yo paytext Berlîn de pêvînayîşan keno. Roja peyêne de heyet Wezîrê Dewlete yê Almanî Niels Annen de dir ame têhet. Pêvînayişo ke pîya Bûldane  parlamentera Êlîhî Feleknaz Ûca, parlamentero verên ê Şirnexî Faysal Sariyildiz, hemşaredara verene ya Cizîre Leyla Îmrete û temsîlkarê HDP’yî yê Ewropa Farûk Dorû zî tewrê ci bîyî pozîtîf ravêrt.

Pêvînayîş de meseleyê Kurdistan û Tirkîya, bitaybetî zî tecrîdê serê Rayberê Şarê Kurdî Abdullah Ocalanî gerîyayî dest. Wezîr Anneno ke endamê Partîya Demokratan a Sosyale (SPD) yo ard ziwan ke ê zî wazenê ke tecrîd wedarîyo û zextê zînadananê Tirkîya biqedîyo.

Pêvînayîş ra dima  wezîr Annen hesabê xo yê medyaya sosyale ser a vat ke ê hemseraka HPD’yî Pervîn Bûldane dir pêvînayîş viraşto û dereheqê weçînitişê Stenbolî û demokrasîyê Tirkîye ser o qisey kerdo.

Temsîlkarê HDP’yî yê Ewropa Farûk Dorû yo ke derheqê pêvînayîş de ANF’yî rê qisey kerd wina va:‘‘Annen vat ke sîyasetê înan vera tecrîdî yo û do wina dewam bikero. Ma zî derheqê grevê vêşanîye  de zanayîş da û vat ke rewşa xoverdayoxan krîtîk a û ganî Almanya vera naye têbigêro. Reyna ma vat ke sey endamê Konseya Ewropa rolê Almanya girdo û ganî vera tecrîdî nê rolê xo kay bikero.‘‘ Dorûyî ard ziwan ke pêvînayîşê înan pozîtîf ravêrtî û înan derheqê tecrîd û grevê vêşanîye de xeylî temsîlkaranê partî û hukmatî de qisey kerdo.

Heyetê HDP’yî yê bi serekîya Bûldane pîya bi wezîr Annen bi sereka pêroyî ya Partîya Demokratan a Sosyale (SPD) Andrea Nahlese, hemserekê Partîya Çepgêre Berndt Rîexîngerî û Partîya Çepgêre ra Gregor Gysî yo ke ronayoxanê partîye bi reyde û temsîlkaranê Partîya Zergûne dir amebi têhet.