Hukmatê AKPyî sey pêro Kurdîstan de keno, Wan û Colemêrg de zî dişmenîya xoza keno. Bi taybetî leşker û qoricîyê dewleta tirke pezkovîyan qetil kenê. Cografyaya Colemêrgî de ke koyê ci berz ê,  heywan û çimeyî zêdêr ê û tede bi hezaran gandarî ciwîyenê.

Neslê nê gandarî hêdî hêdî çin benê. Şerê herême ra daristanî vêşayî, heywan û nebatî zî rîyê HES û awbendan ra çin benê. Şaristan de bi seyan qereqol û kalekolî virazîyenê.

Wareyê Berçelanî û Mêrgabutanî yê Colemêrgî bi cuya xo ya koyîye şinasîyenê. Seywanîya îlegale ra cuya koyî û tabîye nê herêman de çin bîye. Leşker û qoricîyî her roje herême de bi hawayêkê qeçaxî pezkovî, xezal û xeylêk heywanan qetil kenê. Herêma Aladaglarî ya mabênê Wan û Agirî de zî pezkovîyî seydwanîya îlegale ra çin bîyî.

Koyê Sîpanî yê mabênê Wan-Agirî-Bedlîs-Mûşî de zî bi heman hawayî cuya tabîye çin bîye. Sîpan de 20 serrî verê cû gayê koyî estbî. Nê goyî zî bîyî qurbanê seydwanîye.

Dewijê herême vanê leşkerê Tûgayê Komandoyî yê Çiyê herêma Depînî de pezkovîyan seyd kenê. Dewijî anê ziwan  ke seba pawitişê pezkovîyan destê înan ra çita bêro kenê la qîm nêkeno. Dewijî vanê: ''Dewlete qedexeyo ke îlan kerd, bi xo binpay kena. Heywanê koyî qestî ra yenê qetilkerdene. Ma venga rayaumûmîye danê ke na babete de bibê hîşyar û mesuldar.''