Karayilan: Başûr de bin kewtî coka wazenê verê xo bidê Rojawanî

Fermandarê MPŞyî Karayilanî îfade kerd ke rejîmê AKP-MHPyî vera xoverdayîşê gerîlayan ê Metîna, Zap û Avaşînî bin kewt coka wazeno verê xo bido Rojawanê Kurdîstanî. Karayilanî vat pê taktîkanê gerîlayan ê do Rojawan de zî bin bikewê.

Fermandarê Qerargehê Merkezê Pawitişê Şarî (MPŞ) Murat Karayilanî bi rayîrê hacetê bêtelî hêzanê gerîlayan reyde qisey kerd. Karayilanî verî şexsê Bêrîtane de şehîdê teşrîna verêne yad kerdî û no mesaj da:

''Ewro 6 mengê xoverdayîşê Avaşîn, Zap û Metîna temam benê. Eke operasyonê Garê zî biercnê 8 mengî û nêm temam benê. Nê wextî de serebûtê girîngî qewimîyayî. îqtîdarê faşîstî yê AKP-MHPyî wina plan kerd ke 2021 de pêro Başûrê Kurdîstanî û waranê gerîlayan îşxal bikero, têgêrayîşê ma tasfîye bikero. Înan Amerîka, Almanya, Îngilîstan, Iraq û PDKyî ra destek girewt û waşt Komployê Mîyanneteweyî binetîce bikerê.

Înan verî hêrişê Garê kerd la ser nêkewtî. Dima zî 23-24ê nîsane de hêrişê Avaşîn, Zap û Metîna kerd. Înan wina plan kerd ke nê cayan îşxal bikerê, dima zî verê xo bidê Qendîl û Garê. Dewleta tirke pê teknîkê xo û paştdayîşanê dewletan ê bînan bawer kerd û va qey do ser bikewa. Xora dewleta tirke verî zî vera gerîlayan zaf bin kewte. La AKP-MHP-Ergenekonî waşt pê teknolojîya nê çaxî yanî pê fuze û hêrişanê hewayî ser bikewê û dewrê neweyî abikerê. Înan 6 serrî yo çarçewa Planê Çokdayîşî de şer kerd la bin visîyayî.

Vera hêrişanê înan xoverdayîşê Îmraliyî yê Rayber Apoyî tesîrê her cayî kerd. Şarê ma zîndanan de, warê sîyasetî de hêzê xo kerd pîlêr. Hetê bînî ra Gerîlayanê Azadîya Kurdîstanî bi perspektîfê Şerê Şarî yê Şorişgêrî taktîk û qewimîyayîşê neweyî afernayî. Gerîlayan Herêmanê Pawitişî yê Medya de perspektîfê neweyî viraştî. Bi nê hawayî taktîkê şerê tunelî û binerdî virazîyayî û Hemleyanê Şorişgêran ê Bazanê Zagrosî û Cengê Xabûrî verê plananê AKP-MHPyî girewt. Nê taktîkanê gerîlayan dewlete tersnaye.

Xora bingeyê îdeolojîk û felsefeya Rayberîye ra nêbîyêne nê qewimîyayîşî zî nêbîyêne. Gerîlayî xeta azadîya cinîyan a Rayberîye de şer kenê. Tewiro bingeyî yê nê xoverdayîşî embazî, ruh û qerardarîya Apogîre yo. Nê xoverdayîşî de keda şehîdan, rayberîye û embazan esta. Çêrîya Garê ya embaz Şoreş, Rojhat û Seyfîyan lingê perspektîfê ma ronayî. Dima Mamreşo û Zendûra de embazanê ma Rêber, Hêjar, Serhed û Sarya ruhê Şoreşan rê dewam kerd. Qaşûraya Metîna de embaz Rêber û Çekdaran, Zap de Bawer û Delalan, Avaşîn de Şerzan û Ronahîyan pê keda xo şerê gerîlatîye yo giran kerd.

Xoverdayîşê Girê Sorî û Werxelê şerê ma vist astêka bîne. Nê waran de embazan şerê tunelî û erazîyan xo rê kerd esas. Nê 8 mengan de îsbat bi ke şarî eşkenê vera teknîkê pîlî û teknolojîya dewrî şer bikerê. Nê xoverdayîşê ma rayîr mojna pêro şaranê bindestan. Embazanê ma îsbat kerd ke teknîk eşkeno bêro pûçkerdene. Ma semedê ney bedelî dayî, şehîdî dayî la şerê xo îsbat kerd.

Girê Sorî serê sînorê Vakur û Başûrî de yo. Dewleta tirke verî çim verda tîya. Dişmenî 24ê nîsane de verî hêrişê Mamreşoyî kerd û peyê Girê Sorî girewt. dimenî 14ê hezîrane de Girê Sorî girewt binê ablûqa. Embazanê ma yê Girê Zorî zanayêne ke binê na ablûqa de embazê bînî do nêeşkê biresê înan. La înan rayberîya Fermandar Botan Ozgurî de xo ver da û tarîxî rê dersêk verda. Girê Sorî de fermandarîya Apogîre ameye temsîlkerdene. Dişmenî vera xoverdayîşê embazanê ma çeka kîmyewîye xebitnaye. Têna embazo ma yê ercîyaye Baz nê hêrişan de şehîd bi. Dima dişmenî bombaya kîmyewîye eşte û 6 embazê ma şehîd kerdî. La reyna zî dişmen nêeşka bikewo tunelanê şerî. Werxelê de xoverdayîşê bi fermandarîya embaz Cumalî Çorum û Çavrê Gever binkewtişê dişmenî îsbat kerd. Embazanê warê Werxelê çend reyî derbî dayî dişmenî ro.

Xoverdayîşê Girê Sorî û Werxelê de qetî bi ke gerîlayî ser kewenê. Ma semedê xoverdayîşê embazanê Girê Sorî û Werxelê çi vajê kêm maneno. Nê embazanê ma pê înîsîyatîfê xo xoverdayîşêk aver berd û Kurdîstanî rê xizmetêko pîl kerd. Nê xoverdayîşan de rayberîya embazanê ma Zinarîne û Çavrê de performansê şerî ame pêşkêşkerdene. Ma vînenê ke gerîlatê YJA-Starî xeta Bêrîtane de xo aver benê. Xoverdayîşê embaze Zelale Botan û embaze Delale Amed zî ney îsbat kenê. Nê pratîkî de îsbat bi ke şerwanê cinîyî çend bihêz ê. No hêz kokê cinîyan de esto.

No xoverdayîş hetê Rayber Apoyî ra ame averberdene. Nê xoverdayîşî kerd ke dewleta tirke qels biba û rejîmê AKP-MHPyî verbi rijîyayîşî şoro. Seke zanîyeno înan armanc kerd ke heta temuze Başûrî îşxal bikerê, kadroyanê ma yê rayberan bikişê û teşrîna peyêne ya 2021î de weçînayîşî bikerê. Coka no proses ma rê zaf girîng o. Eke ê ser bikewtêne rejîmê xo do mende bikerdêne, teda giranêr bikerdêne û xeyalê xo yê Osmanîya newîye bîyardêne ca. Eke înan Herêmê Pawitişî yê Medya îşxal bikerdêne dore ameyêne Başûrî. La Hemleyanê Bazanê Zagrosî û Cengê Xabûrî rayîr nêda înan. Rejîm sey Garê Avaşîn, Metîna û Zap de zî bin kewt. Xora dişmen wazeno serê ney bigêro la ê bin kewtî.

No proses prosesêko tarîxî yo. Destê ma de firsendê pîlî estê. Dewleta tirke wazena pêro kurdan qir bikera û sînoranê Mîsak-i Mîllî awan bikera. Gerîlayê Azadîya Kurdîstanî hem hêzê xoverdayîşî yê hem zî hêzê demokrasî yê. Xoverdayîşê nê gerîlayan ra nêbîyêne rejîmê faşîstî rewî ra tedaya xo îlan kerdbî. Rayber Apoyî semedê şarê Kurdîstanî û pêro şaranê dinya Modernîteya Demokratîke afernaye. Gerîlayê Azadîya Kurdîstanî zî wazenê çarçewa Modernîteya Demokratîke de bi Projeyê Neweraawanbîyayîşî serê ra heta bînî xo bivurnê û Gerîlatîya Modernîteya Demokratîke aver berê. Gerîlatîya Modernîteya Demokratîke vera teknolojî û teknîkê nê dewrî sehne de ya.

Rejîmê AKP-MHPyî semedo ke Başûrê Kurdîstanî de bin kewt wazeno verê xo reyna bido Rojawanê Kurdîstanî. Rejîm mîyanê krîzê ekonomîk, sîyasî, komelkî, kulturelî de yo û hînî peynîya ci ameya. Înan verî mabênê Amerîka û Rûsya de manevra kerdêne û bi nê hawayî xo xelisnayêne. La rejîmê AKP-MHPyî vera gerîlayan bin kewt. Semedo ke ê nê binkewtişî mîyan bikerê wazenê vera Sûrîye û Rojawanî hemleyêka newîye bidê destpêkerdene.

Eke şerwan û fermandarê Rojawanê Kurdîstanî pê taktîk û perspektîfanê gerîlayanê Herêmanê Pawitişî yê Medya têbigêrê dewleta tirke hêriş zî bikera îşxalê Girê Sipî, Serêkanîyê û Efrînî dibare nêbeno. Eke şerwan û fermandarê Rojawanî şerê şarî yê şorişgêrî û şerê tunelî bikerê, eke şar koç mekero û paştî bido şerwanan rejîmê AKP-MHPyî û cergê ci do bin bikewê. Coka tecrubeyê gerîlayanê Başûrî girîng o. Eke şerwanê Rojawanî nê tecrubeyan ra îstîfade bikerê rejîm Rojawan de do bêro binkerdene.

A raşte dişmen wayîrê ê hêzî nîyo ke vera gerîlayan şer bikero. Dişmen îstîxbarat arê dano, keşf keno, pê hêzanê hewayî hêriş keno. Gerîlayan vera ney şerê tunelî kerd û xo pawit. Dişmenî coka bi namerdî dest eşt çeka kîmyewîye. Destê dişmenî de vera gerîlayan têna çeka kîmyewîye esta. Nêbo dişmen nêeşkayêne vera ma şer bikero. Eke ma taktîk û pratîkanê embazanê xo yê şehîdan aver berê qetî do ser bikewê. Xoverdayîşê 8 mengan ney eşkera keno. Nê esasê hêvî û bawerî de ez pêro embazan pê heskerdiş û rêzî selam kena, rayraşîyayîşê azadîya Rayber Apoyî û Kurdîstanî de înan rê serkewtiş wazena.''