Rixmê qeraro ke ‘cemxaneyî îbadetxane yê, faturayanê ci yê awe û elektrîkî dewlete dana’ hetê mehkeme ra bêro dayene zî, cemxaneyo ke girêdayîyê Beşê Komela Kulturî yê Pîr Sultan Abdalî (PSAKD) yê Amedî yo, 7 mengî yo rîyê deynê faturayan ra elektrîkê ci ameyo birnayene.

 Serekê Beşê PSAKD’î yê Amedî Cafer Kolumanî reaksîyon da na rewşe û ard ziwan ke, rîyê birnayîşî elektîkî ra ê nêeşkenê cem girê bidê û vat, “Ma selahîyetdaran ra randevu girewt û do şorê. Eke elektîrîkê cemxaneyî nêro verdayene, ma do prosesê huqûqî bidê destpêkerdene.”  

Kolumanî  ard ziwan, na rewşe mojnena ma ke dewlete hîna cemxaneyan sey îbadetxane qebûl nêkena û vat, “Verê cû zî na babete de qerarî ameyî dayene ke faturayê elektrîkî yê cemxaneyan hetê dewlete ra bêro dayene, no sebeb ra ma birnayîşê elektrîkî qebûl nêkenê. Cemxaneyî merkezê ma yê îbadetxaneyî yê. Tîya de salonê ma yê ke ma tede aktîvîteyanê kulturkî û cimatkîyan kenê estê, reyna morg esto. Rîyê birnayîşê elektîrkî ra ma wezîfeyanê xo yê bawerîye nêeşkenê bîyarê ca. Ma do selehîyetdaranê DEDAŞ’î de reyêka bîne pêvînayîşan bikerê. Eke qerarêko nêgatîf bivejîyo, ma na babete benê mehkeme û prosesê huqûqî do bidê destpêkerdene.”